Grupi negociator i Partisë Socialiste mohoi të ketë krijuar një identikit të Presidentit të ri të vendit. Në një konferencë për mediat, Taulant Balla deklaroi se do të ketë konsultime me Enkelejd Alibeajn për emrin e ri, ndërsa mohoi që ky emër të dalë nga radhët e demokratëve.
Socialistët do të paraqesin këtë javë, në mbledhjen e grupit, 3 emra të mbyllura në zarf me kandidatët që preferojnë për President të Republikës. Njëkohësisht, do të vijojnë konsultimet dhe me grupet parlamentare të opozitës.
“Duke qenë se koha është shumë e shkurtër, do të takohemi me tre kryetarët e grupeve: Enkelejd Alibeajn, Mesila Dodën dhe Fatmir Mediun”, tha Balla.
Socialistët përjashtuan mundësinë e konsultimit me Komisionin e Rithemelimit: “Nuk ka në Kuvend një grup parlamentar me emrin e Komisionit të Rithemelimit. Nuk e njoh një grup të tillë”.
Por, pavarësisht konsultimeve, socialistët nuk janë të gatshëm të miratojnë një emër të dalë nga opozita: “Ne duam një President normal, krejt ndryshe nga Ilir Meta. Shqipërisë nuk i duhet një President tjetër nga opozita aktuale”.
Konsultimet e grupit negociator të PS-së do të vijojnë deri më datë 29 maj, kur do të mbahet dhe Konferenca e Kryetarëve, në të cilën do të përcaktohet dhe agjenda e Parlamentit për zgjedhjen e Presidentit.
