Presidenti kinez Xi Jinping ka përsëritur thirrjen për armëpushim të menjëhershëm në luftën mes Izraelit dhe Hamasit.
Jinping e bëri këtë apel teksa fliste në një samit të jashtëzakonshëm virtual të BRICS mbi çështjen palestinezo-izraelite.
“Në situatën aktuale, është në kohën e duhur dhe e nevojshme që BRICS të japë një zë drejtësie dhe paqeje për çështjen Palestinë-Izrael”, tha Xi, sipas një leximi nga agjencia shtetërore e lajmeve Xinhua.
Gjithashtu, ai bëri thirrje që të ndalen të dhuna dhe sulmet ndaj civilëve, të ndërmerren hapa për të siguruar kalimin e sigurt dhe të qetë të ndihmave humanitare, ofrimin e më shumë ndihmave humanitare për njerëzit në Gaza dhe ndalimin e “dënimit kolektiv” ndaj popullit të Gaza përmes migrimit të detyruar dhe ndërprerjes së furnizimit me ujë, energji elektrike dhe naftë.
“Unë e kam theksuar disa herë se mënyra përfundimtare për të zgjidhur konfliktet e përsëritura midis Palestinës dhe Izraelit është ‘zgjidhja me dy shtete’,” tha Xi, duke shtuar se pa një zgjidhje të drejtë për çështjen e Palestinës, nuk do të ketë paqe dhe stabilitet të qëndrueshëm në Lindjen e Mesme.
Në samitin virtual emergjent morën pjesë Brazili, Rusia, India, Kina dhe Afrika e Jugut. Afrika e Jugut kryesoi samitin virtual. Presidenca e Afrikës së Jugut tha se liderët e Arabisë Saudite, Argjentinës, Egjiptit, Etiopisë, Iranit dhe Emirateve të Bashkuara Arabe ishin gjithashtu të ftuar të merrnin pjesë dhe të flisnin.
Xi bëri thirrje për një armëpushim dhe tha se një zgjidhje me dy shtete ishte e vetmja rrugëdalje nga konflikti Izrael-Hamas në mes të tetorit, transmeton CNN.
Në atë kohë ai tha se Kina është e gatshme të punojë me Egjiptin dhe vendet arabe për të “promovuar një zgjidhje gjithëpërfshirëse, të drejtë dhe të qëndrueshme për çështjen palestineze”, sipas CCTV.
