Presidenti i Kosovës, Hashim Thaçi, e ka uruar Prishtinën për fitimin e Kupës së Kosovës të mërkurën, duke thënë se pret që bardhekaltrit të kenë sukses edhe në kualifikime për pjesëmarrjen në Ligën e Evropës.
Prishtina e fitoi trofeun e shtatë të Kupës së Kosovës dhe të parin nën udhëheqjen e trajnerit Armend Dallku, pasi e mposhti 1:0 Ballkanin falë golit të Otto John të mërkurën në Stadiumin Fadil Vokrri.
Dallku e mori drejtimin e ekipit të parë të Prishtinës pas një periudhe të suksesshme me ekipin U-19 dhe, përveç trofeut, ia ka siguruar edhe një vend në kualifikime për pjesëmarrje në Ligën e Evropës për herë të parë pas vitit 2018 dhe të tretën në histori të klubit.
Presidenti i vendit, i cili ishte i pranishëm në ndeshje dhe ia dorëzoi trofeun kapitenit të klubit nga kryeqyteti, Armend Thaçit, e lartësoi lojën e Prishtinës.
Ai nënvizoi se bardhekaltrit treguan shpirt luftarak dhe cilësi në triumfin ndaj klubit nga Suhareka.
“Prishtinë, urime fitorja e Kupës së Kosovës në futboll. Me këtë kualitet, dinamikë dhe shpirt luftarak, suksese presim edhe në Ligën e Evropës”, shkroi presidenti Thaçi në llogarinë e vet zyrtare në Facebook.
Prishtina do t’i ketë kohë për një pushim të shkurtër, para se të luajë në kualifikime për Ligën e Evropës në muajin gusht.
