Presidentja e Kosovës Vjosa Osmani i ka uruar mirëseardhjen në Kosovë kompanisë së shërbimeve cilësore të internetit Starlink.
“Mirësevjen në Kosovë”, ka shkruar Osmani në platformën X, duke etiketuar kompanisë Starlink dhe inovatorin Elon Musk.
Starlink, platforma e internetit satelitor të Starlink Services, LLC, një degë në pronësi të plotë të kompanisë amerikane të hapësirës ajrore SpaceX të Elon Musk tashmë operon edhe në Kosovë.
Këtë e konfirmoi vetë miliarderi përmes një postimi në X një ditë parë.
“Interneti me shpejtësi të lartë dhe me vonesa të pakta i Starlink-ut tani është në dispozicion edhe në Kosovë!’’.
SpaceX nisi satelitët e saj të parë testues Starlink në orbitën e Tokës në vitin 2018 dhe satelitët e parë operacionalë në vitin 2019. Që atëherë SpaceX ka dërguar në orbitë më shumë se 5000 satelitë Starlinks nga Florida dhe Kalifornia, duke përdorur raketat e veta Falcon.
Në muajin tetor, Autoriteti Rregullativ i Komunikimeve Elektronike dhe Postare në Kosovë (ARKEP) tha se e ka autorizuar kompaninë amerikane Starlink, për ofrimin e qasjes në internet në çdo pjesë të Kosovës.
