Fjalimi i kryeministrit të Kosovës Albin Kurti, në sheshin kryesor të Tetovës ka sjellë zemërimin e presidentit serb Vuçiq.
Kurti e këshilloi nga Tetova qeverinë e Maqedonisë së Veriut që të ishte më afër Kosovës, Shqipërisë dhe Bullgarisë e sa më larg Serbisë.
“Maqedonia e Veriut sa më afër Kosovës, Shqipërisë dhe Bullgarise e sa më larg Serbisë e cila nuk po distancohet as nga Millosheviqi dhe as nga Putini. Aq më afër ajo, pra aq më afër Maqedonia e Veriut do të jetë anëtarësimit të Bashkimit Europian dhe aq më i sigurt do të jetë rajoni jonë i Ballkanit. E për këtë ne duhet ta ndihmojmë e do ta përkrahim Maqedonine e Veriut”, tha Kurti.
E Vuçiq pretendon se Kurti po përpiqet të nxisë trazira jo vetëm në Maqedoninë e Veriut, por edhe në jug të Serbisë.
“Vizita e Kurtit ne Tetovë është skandal mbi skandale. Aty u promovua ideja e Shqipërisë së Madhe, aty u shfaqën simbolet e saj. Kurti u prezantua aty si kryeministër i të gjithë shqiptarëve. Përuroi rrugën Adema Demaći i cili ishte edhe mentori dhe idhulli i Albin Kurtit”.
“Nëse nuk do të ishim kaq të fortë, ta dini se ai nuk do të sulmonte vetëm Serbinë qendrore, por edhe Maqedoninë e Veriut, Malin e Zi dhe pyetja është se çfarë do të ndodhte me Shqipërinë. Kurti duket se ka mbështetjen e heshtur të një pjese të bashkësisë ndërkombëtare”, tha presidenti serb.
Edhe pse shfaqi frikën e një sulmi nga ushtria e Kurtit presidenti serb u tha ndjekësve të intervistës së tij me gazetaren e PiNK TV se i duhet të përpiqet nga njëra anë të ruajë paqen dhe nga ana tjetër të forcojë ushtrinë.
