Një lëvizje e re ka ardhur nga administrata amerikane teksa pas grumbullimit ushtarak të Rusisë në rajonet afër kufirit ukrainas janë rritur shqetësimet se ushtria ruse do të hyjë në Ukrainë
Pretendohet se SHBA-ja u ka dhënë leje Letonisë, Lituanisë dhe Estonisë që të dërgojnë armët e tyre të prodhimit amerikan në Ukrainë me qëllim që të mbështesin këtë vend, transmeton Anadolu Agency (AA).
Një lëvizje e re ka ardhur nga administrata amerikane teksa pas grumbullimit ushtarak të Rusisë në rajonet afër kufirit ukrainas janë rritur shqetësimet se ushtria ruse do të hyjë në Ukrainë.
Në lajmin e gazetës amerikane “Wall Street Journal” të bazuar në një zyrtar, pretendohet se SHBA-ja u ka dhënë leje anëtarëve të rajonit Baltik të NATO-s, Letonisë, Lituanisë dhe Estonisë që të dërgojnë raketat anti-tank Javelin dhe anti-ajrore Stinger me qëllim për të mbështetur ushtrinë ukrainase.
Një zyrtar që ka folur për gazetën ka thënë se administrata e presidentit amerikan Joe Biden ka njoftuar Kongresin lidhur me miratimin e shitjes së helikopterit transportues Mi-17 për Ukrainën.
Ndërkohë Departamenti amerikan i Mbrojtjes dhe Departamenti i Shtetit janë shmangur të japin deklarata për këto dy çështje.
Teksa tensionet në rajon janë përshkallëzuar, sekretari i Shtetit, Antony Blinken vizitoi Kievin dhe përsëriti mbështetjen për Ukrainën.
SHBA-ja paralajmëron se do të vendosë sanksione të rënda ndaj Rusisë nëse pushton Ukrainën.
Blinken dhe ministri i Jashtëm rus, Sergey Lavrov do të takohen sot në Gjenevë për të biseduar për sigurinë e rajonit dhe kryesisht tensionet në kufirin e Ukrainës.
