Fejesa e Princ Leka II me Blerta Celibashin ka rikthyer sërish në qendër të vëmendjes familjen mbretërore shqiptare. Këtë herë, vëmendja nuk është tek historia e dashurisë, por tek unaza që po bën xhiron e mediave botërore.
Sipas revistës britanike “Hello Magazine”, princi shqiptar i ka propozuar partneres me një unazë fejese që vlerësohet në rreth 120 mijë paund, ose afërsisht 140 mijë euro.
Eksperti i bizhuterive Nilesh Rakholia e përshkruan unazën si “të qetë, elegante dhe pa teprime” – një diamant me prerje ovale ose cushion, i vendosur mbi një shirit të hollë të zbukuruar me gurë pavé.
Rakholia shton se, nëse diamanti qendror është 2 deri në 3 karatë, çmimi i llogaritur është plotësisht i arsyeshëm.
Ai e quan stilin “regal, por bashkëkohor”, një mënyrë për të treguar status dhe dashuri, pa pasur nevojë për ekstravagancë.
Propozimi romantik ndodhi më 11 tetor 2025 në Ksamil, një nga vendet më të dashura të rivierës shqiptare.
Çifti ndau lajmin në rrjetet sociale, me foto nën diellin e vjeshtës, ku unaza shkëlqente në dorën e Blertës. Oborri Mbretëror e quajti këtë moment “fillimin e një kapitulli të ri”.
Fejesa vjen një vit pas ndarjes së Princ Lekës nga Elia Zaharia, me të cilën ka një vajzë, Princeshën Geraldinë.
Lidhja me Blerta Celibashin u bë publike në shtator 2024 dhe që atëherë ata janë parë së bashku në ngjarje kulturore dhe bamirësie.
Artikulli i “Hello Magazine” ka nxitur një valë reagimesh në mediat ndërkombëtare si “People”, “9Honey”, “Tatler”, “Sky News” dhe “Geo News”, të cilat theksojnë detajet e unazës, vendin e propozimit dhe raportin e çiftit.
Në një kohë ku fejesat e personazheve publikë shpesh kthehen në spektakël, zgjedhja e Princ Lekës për një unazë të sofistikuar, por të përmbajtur, po vlerësohet si shembull i “luksi të heshtur” — një simbol dashurie me klas, që flet më shumë për ndjenjën sesa për çmimin.
