Reshjet e ditëve të fundit kanë shkaktuar një sërë problemesh në zonën e Librazhdit dhe bashkitë përreth, duke dëmtuar infrastrukturën rrugore dhe atë lumore, si dhe duke krijuar vështirësi të përkohshme në qarkullim.
Në Njësinë Administrative Mirakë është shembur mbrojtja lumore, duke rritur rrezikun e erozionit në zonë. Ndërkohë, në Nj.A Hotolisht, në fshatin Xhyrë, është dëmtuar këmbëza e mesit e një ure tip “Bailey”, çka ka sjellë ndërprerje të qarkullimit për automjetet.
Probleme janë shënuar edhe në disa akse rrugore:
Elbasan – Qafë-Thane, segmenti Librazhd–Prrenjas, ku ka patur rënie gurësh;
Gramsh – Moglicë, në zonën e Bratilës, ku janë regjistruar rëshqitje inertesh dhe gurësh;
Elbasan – Peqin, në fshatin Paulesh, ku gjatë natës ka patur bllokim të pjesshëm për shkak të inertesh dhe rrëzimit të një peme.
Për të gjitha rastet është ndërhyrë nga firmat kontraktore dhe qarkullimi është normalizuar, ndërsa akset rrugore mbeten të hapura.
Lumenjtë në kuota mesatare, Shkumbini dhe Devolli mbi mesatare, por pa rrezik
Sipas të dhënave, prurjet e lumenjve dhe përrenjve janë kryesisht në kuota mesatare (përroi Zaranikës dhe Pajunit), ndërsa Shkumbini dhe Devolli paraqesin prurje mbi mesataren, por pa rrezik daljeje nga shtrati.
Në fshatin Kërpice, Nj.A Kushovë, lumi i Kërpices ka pasur rritje të konsiderueshme prurjesh, duke shkaktuar gërryerje të tokave bujqësore në afërsi të fshatit. Deri tani nuk raportohen banesa të rrezikuara.
Në furnizimin me energji elektrike ka mungesa në:
Nj.A Stravaj, Bashkia Prrenjas
Nj.A Mollas, Bashkia Cerrik
Ekipet e OSHEE-së ndodhen në terren për riparimin e defekteve.
