Shumica parlamentare, qartazi është e vendosur që të votojë pro projektligjit për ata studentë që mbarojnë studimet në mjekësi. Në seancën parlamentare ku po debatohet ashpër për këtë projektligj midis pozitës dhe opozitës, pas ministres së Arsimit, Evis Kushi, në mbrojtje ka dalë edhe ministrja e Shëndetësisë, Ogerta Manastirliu.
Sipas saj, detyra parësore është kujdesi ndaj qytetarëve shqiptarë, duke shtuar paralelisht edhe burimet njerëzore. Ajo nënvizoi se ministria e Shëndetësisë ka shtuar edhe numrin e kuotave të pranimeve në universitet.
Manastirliu ka nënvizuar se projektligji nuk bie ndesh me Kushtetutën, duke shtuar se vendet e zhvilluara po thithin shumë profesionistë në këtë fushë dhe është krejt e natyrshme që Shqipëria të ndërtojë instrumentat e saj, pasi, edhe për shkak të ndryshimeve demografike, “duhen ruajtur burimet njerëzore”.
“Ne kemi rritur pagat për sistemin shëndetësor nga zero që ishte në qeverisjen e opozitës. Plani ynë ecën në shumë drejtime dhe nuk shtrihet vetëm në një drejtim. Kemi rritur kuotat në mjekësi, si dhe kemi më shumë mjekë që specializohen në specialitete të veçanta.”- deklaroi Manastirliu.
Pak ditë më parë Manastirliu u shpreh se interesi më i lartë i qytetarëve është ai për shëndetin mjekësor, ndaj dhe qeveria ka parë mundësitë sesi të ndërtojë një ligj që tu japë studentëve disa trajtime që ata të mundësojnë qëndrimin në vend, duke u punësuar.
“Të gjithë studentët që do të lidhin marrëveshje me ministrinë e Shëndetësisë, do tu mundësohet punësim, të përfitojnë pas punësimit politikën e strehimit social dhe më pas të drejtën e specializimit. Detyra jonë është të sigurojmë trajtim mjekësor dhe të rrisim numrin e kuotave të pranimit deri në 500, që të kemi më shumë mjek të diplomuar.”- u shpreh ministrja.
