Një protestë e madhe u mbajt mbrëmjen e së mërkurës në Malin e Zi, kundër një ligji që synon të kufizojë kompetencat e presidentit Milo Gjukanoviç dhe kalimin e tyre te Kuvendi.
Ndryshimet u hodhën në votim dhe u miratuan nga 41 deputetët e Frontit Demokratik pro-rus, Demokratëve dhe Lëvizjes Qytetare Ura.
Protestuesit mbanin parulla si “Stop dhunës institucionale”; “Agjencia Ruse Jashtë”; “Jo grushtit të shtetit”.
Ndryshimet e miratuara parashikojnë mes të tjerash që nëse presidenti nuk propozon mandatar për formimin e qeverisë, atëherë mandatin e merr një kandidat që ka mbështetjen e qartë të shumicës së deputetëve.
Në shtator, presidenti Gjukanoviç refuzoi propozimin që Miodrag Lekiç, të jetë mandatari i ri për formimin e qeverisë, ndërsa hodhi propozimin që të shkurtohet mandati i parlamentit aktual, për t’u hapur rrugën zgjedhjeve.
Partitë opozitare thanë se ndryshimet e përfshira në ligj paraqesin shkelje të Kushtetutës së Malit të Zi.
