Nëse mendoni se i keni parë të gjitha në këto vite qeverisje nga Edi Rama dhe Partia Socialiste, thjesht e keni gabim!
Pas 12 vitesh pushtet me plot skandale ku ngërthehen së bashku korrupsioni dhe krimi i organizuar, socialistët janë kujtuar për një operacion të ri makijazhi politik. Kanë vendosur t’i shpallin luftë nepotizmit dhe klientelizmit në zyrat e shtetit. Dhe si do e bëjnë këtë? As më e shumë e as më pak, por përmes një strukture partiake.
Aq ironike është si nismë sa pikërisht arkitektët e shkallmimit të shtetit, nepotizmit dhe klientelizmit të ngritur në sistem, tani na paskan reflektuar dhe duan që përmes një Komisioni Etike në Partinë Socialiste, të shpëtojnë Shqipërinë nga bataku ku e kanë zhytur vetë.
Drafti prezantohet në Grup Parlamentar, e pranishme edhe e pandehura Balluku
Nisma e deklaruar që në Asamblenë e PS në muajin shtator, sot është prezantuar nga Adea Pirdeni në mbledhjen e Grupit Parlamentar të Partisë Socialiste, ku ishte i pranishëm edhe vetë Edi Rama.Komisioni i Etikës që do të ngrejë Partia Socialiste është një lloj “policie politike”, që pritet të shërbejë si instrument i vetëkontrolli brenda partisë.
“Në funksion të transparencës, përgjegjshmërisë dhe standardeve europiane të qeverisjes”, pretendojnë socialistët. Por deri më tani nuk dihen shumë detaje se si do të funksionojë ky komision, si do të gjurmohen apo parandalohen emërimet nepotike dhe klientelizmi.
Ironia tjetër qëndron edhe në faktin se teksa ministrja e Antikorrupsionit, Adea Pirdeni recitonte relacionin në mbledhjen e Grupit Parlamentar të Partisë Socialiste, në sallë ishte rikthyer edhe Belinda Balluku.
Krahu i djathtë i Edi Ramës është zyrtarisht e pandehur nga SPAK për aferën në tenderin e tunelit të Llogarasë. E ulur aty pranë Ramës, Balluku dëgjonte predikimet se si Komisioni i Etikës në parti do të shpartallojë nepotizmin dhe klientelizmin në shtetin tonë.
Përbërja e Komisionit
Siç mëson Lapsi.al nga një burim brenda mbledhjes së grupit të PS-së, aty janë komunikuar edhe emrat e që do të jenë pjesë e këtij komisioni. Drejtimi i është besuar Lindita Nikollës, ish-kryetares së Kuvendit e cila përloti deputetët e PS-së kur iu dha “lajmin e kobshëm” se po dorëhiqej për çështje shëndetësore dhe se do t’i përkushtohej familjes.
Jo vetëm që nuk ishte kështu, por Lindita tani ngjitet dhe në krye të “policisë politike” të PS-së për të luftuar nepotizmin. Në këtë komision janë gjithashtu edhe tre deputetë të rinj; Ermal Elezi, Erjona Ismaili dhe Kiduina Zaka.
Ironi më vete është edhe fakti se këta që vetë s’kanë bërë asnjë betejë politike për të qenë në Parlament, por janë bërë deputetë në sajë të nepotizmit dhe lidhjeve klienteliste me oborrin e pushtetit të Edi Ramës, tani do të luftojnë nepotizmin në administratën publike.
Rama-Balluku ndalojnë deputetët të publikojnë foto nga mbledhja
Siç mësoi Lapsi.al nga mbledhja e sotme, Edi Rama kishte lënë edhe një porosi në fund; të mos publikoheshin foto prej takimit. Në mos shqetësim direkt i tij, gjasat janë të ketë qenë kërkesë e Belinda Ballukut, për të shmangur çdo portret të saj të rikthimit si e pandehur në mbledhjen e Grupit Parlamentar të Partisë Socialiste. Grup i cili në fakt në masë të madhe i është gëzuar goditjes së Ballukut nga SPAK.
Përjashtim këtu bëjnë vetëm “kamikazët” si Zegjineja, Erjo, Kiduina etj, që ajo i bëri deputetë nga hiçi. Veç prezantimit të draftit për Komisionin e Etikës në PS, Rama sot kërkoi gjithashtu më shumë prezencë të deputetëve në terren për të takuar njerëzit.
Takime në terren dhe solidaritet brenda grupit
Siç mësoi Lapsi.al ai përcolli edhe mesazhe se qëndrimi i shumicës në raport me drejtësinë nuk ka ndryshuar, por mes fjalëve të tij, kryeministri la të kuptohej se në këtë fazë me goditje prej drejtësisë, mazhoranca duhet të ruajë kohezionin e brendshëm dhe të sillet si një skuadër kompakte.
Me pak fjalë Rama ka dashur të frenojë entuziazmin apo gëzimin, brenda grupit të PS-së pikërisht për goditjen që i erdhi Belinda Ballukut, goditje e cila siç thonë shumë zëra nuk ka mbaruar vetëm te masa e pezullimit nga detyra. ©LAPSI.al
