Kryesia e Partisë Socialiste ka vendosur të bëjë ndryshime të drejtuesve politikë të disa qarqeve në një kohë kur zgjedhje lokale, të parashikuara për vitin e ardhshëm, po afrohen.
Kështu, burime për A2 CNN bëjnë me dije se Arben Ahmetaj nuk do të jetë më i dërguar i socialistëve në Vlorë dhe në vend të tij është caktuar Blendi Klosi. Elisa Spiropali zëvendëson Edona Bilalin në Shkodër, ndërsa ish-kryeministri Pandeli Majko shkon në Kukës.
Në fund të mbledhjes, kryeministri Rama deklaroi se të gjitha ndryshimet në skuadrën e socialistëve vijnë natyrshëm në rrugën e nisur drejt fushatës.
Mes të tjerash, kreu i mazhorancës iu përgjigj dhe interesit të gazetarëve për sekuestrimin e ndërtimeve pa leje.
Ai deklaroi se nuk do të ketë asnjë tolerim, ndërkohë që ndërtimet që do të sekuestrohen do të shkojnë të gjitha për interes publik.
“Nëse një biznesmen mbi një leje të marrë nga bashkia bën një shkelje dhe ndërton x metra katrorë për qëllim fitimi, vendimi ynë është I prerë, ai nuk do ti gëzojë ato do të konfiskohen ose do të paguhen nga biznesmeni me cmimin e tregut ose do të dhurohen në vullnet të mirë. Ose do të përdoren për mjedise për shtetin, ose për strehim social. Nuk do të ketë asnjë ndërtues që do të ndërtojë një metër pa leje sepse do ti kushtojë shumë dhe nuk do të ketë interes ti hyjë asaj aventure. Sot kemi 10 fish më pak ndërtime pa leje”, u shpreh Rama.
Kryeministri foli dhe për çështjen e mbylljes së kolegjit turk, duke refuzuar kategorikisht ndërhyrjen e drejtpërdrejtë të presidenti Erdogan në këtë vendimmarrje.
