Presidentët e Polonisë dhe të shteteve baltike po vizitojnë Kievin për bisedime me homologun e tyre ukrainas, Volodymyr Zelensky.
Por, siç kanë raportuar mediat e huaja, atyre nuk do t’u bashkohet homologu i tyre gjerman.
Frank-Walter Steinmeier anuloi planet e tij për t’u bashkuar me grupin pasi Ukraina e bëri të qartë se ai nuk ishte i mirëpritur, me kancelarin Olaf Scholz tani të ftuar në vend të tij.
Plani, tha Steinmeier gjatë një udhëtimi në Varshavë, ishte “ndërmarrja e një udhëtimi në Kiev për të dërguar një sinjal të fortë të solidaritetit të përbashkët evropian me Ukrainën”.
“Unë isha gati ta bëja këtë, por me sa duket-dhe duhet ta mbaj parasysh këtë-kjo nuk ishte e dëshiruar në Kiev”.
Gazeta gjermane Bild citoi burime ukrainase duke thënë se Steinmeier-it iu refuzua vizita në Kiev “për shkak të lidhjeve të ngushta me Rusinë në vitet e fundit”, vë në pah BBC.
Javën e kaluar, Steinmeier pranoi se kishte gabuar në lidhje me Rusinë, duke thënë se politika gjermane ndaj Moskës kishte dështuar dhe se ai ishte gabuar për përpjekjen për të ndërtuar ura me Putinin dhe për mbështetjen e Nord Stream 2.
Ndërkohë, disa politikanë gjermanë kanë shprehur irritim dhe habi që presidenti gjerman Frank-Ëalter Steinmeier nuk është i mirëpritur në Kiev – duke thënë se vizita e tij e planifikuar me liderët nga Polonia dhe shtetet baltike do të kishte treguar solidaritetin gjerman me Ukrainën.
Në një postim në rrjetet sociale, Aydan Özoguz, një anëtar drejtues i partisë Social Demokrate të Steinmeier, tha se ishte irrituese dhe jo veçanërisht gjë e zgjuar që Ukraina të kërkonte shumë mbështetje nga Gjermania, por të mos ishte e gatshme “të shihte” presidentin.
Por shumë në Gjermani thonë se e kuptojnë pozicionin e Ukrainës dhe duan që Berlini të bëjë më shumë për të mbështetur Kievin-duke përfshirë veprimin më të shpejtë për furnizimin me armë dhe ndalimin e energjisë ruse.
