Rudy Giuliani ka pranuar se ka bërë komente publike të rreme, duke pretenduar në mënyrë të gënjeshtër se dy punonjëse të zgjedhjeve të Xhorxhia, kanë kryer mashtrime me votat gjatë garës presidenciale 2020, por ai argumentoi se deklaratat e tij mbroheshin nga Amendamenti i Parë.
Ky pohim i Giuliani, i cili si pjesë e ekipit ligjor të Donald Trump u përpoq të përmbyste rezultatet në shtetet e fushëbetejës, u bë gjatë paraqitjes së një padie nga Ruby Freeman dhe Wandrea “Shaye” Moss.
Padia e tyre e formuluar në dhjetor 2021, e akuzoi ish-kryebashkiakun e qytetit të Nju Jorkut për shpifje ndaj tyre, duke deklaruar në mënyrë të rreme se ato ishin përfshirë në mashtrim gjatë numërimit të votave në State Farm Arena në Atlanta.
Padia thotë se Giuliani, në mënyrë të përsëritur, deklaroi se Freeman dhe Moss – nënë e bijë – nxorrën valixhet me fletëvotime të paligjshme dhe kryen akte të tjera mashtrimi në përpjekje për të ndryshuar rezultatin e garës.
Megjithëse Giuliani nuk kundërshtoi se deklaratat ishin të rreme, ai nuk pranoi se ato i kishin shkaktuan ndonjë dëm Freeman ose Moss.
Ky dallim është i rëndësishëm sepse paditësit në një çështje shpifjeje, duhet të provojnë jo vetëm se një deklaratë e bërë ndaj tyre ishte e rreme, por se ajo deklaratë rezultoi edhe me dëme reale.
Moss i tha komitetit të Dhomës së Përfaqësuesve që hetonte trazirat e Kapitolit se jeta e saj ishte shkatërruar nga akuzat e rreme. Ajo tha se mori mesazhe urrejtjeje dhe raciste “duke më uruar vdekjen, duke më thënë se do të jem në burg me nënën time. Dhe duke thënë gjëra të tilla si, “Gëzohu që është 2020 dhe jo 1920”.
Freeman tha në dëshminë e saj: “Nuk kam asnjë vend ku mund të ndihem e sigurt.”
Deklarata e Giuliani i ishte bashkangjitur një dosjeje, duke argumentuar se ai nuk kishte dështuar në paraqitjen e provave për këtë rast dhe nuk duhet të sanksionohet siç kanë kërkuar Freeman dhe Moss.
Michael Gottlieb, një avokat për Freeman dhe Moss, tha në një deklaratë të dërguar me email se Giuliani po pranon “atë që ne e kemi ditur gjithmonë, Ruby Freeman dhe Shaye Moss kryen me nder detyrat e tyre si qytetare në zgjedhjet presidenciale 2020, në përputhje të plotë me ligjin. Akuzat për mashtrim zgjedhor që ai dhe ish-Presidenti Trump bënë kundër tyre kanë qenë të rreme që nga dita e parë.”
Disa çështje, duke përfshirë dëmet, ende duhet të vendosen nga gjykata. Gottlieb tha se Freeman dhe Moss janë “të kënaqur për këtë moment historik në luftën e tyre për drejtësi dhe mezi presin që t’i paraqesin ato në gjyq”.
Në një paraqitje gjyqësore, Giuliani i kërkoi gjyqtarit që të hidhte poshtë padinë, duke argumentuar se pretendimet kundër tij ishin të ndaluara nga mbrojtja e Amendamentit të Parë për fjalën e lirë. Howell e hodhi poshtë këtë kërkesë, duke lejuar që padia të vazhdojë. Apnews
