Presidentët e Francës dhe Rusisë, Emmanuel Macron dhe Vladimir Putin kanë hedhur një hap të rëndësishëm në përpjekjet për të ndalur luftën në Lindje të Ukrainës.
Pas një bisede telefonike që zgjati 105 minuta, palët ranë dakord për mbajtjen e një samiti të nivelit të lartë për të diskutuar vendosjen e një armëpushimi në Lindje të Ukrainës, por edhe për të marrë një vendim mbi ndalimin e një konflikti më të gjerë të armatosur.
Pallati Elize tha se në tryezë do të ulen Rusia, Ukraina dhe OSBE. Në krahun tjetër Krelimi këmbëngul që në bisedime të marrin pjesë Rusia, Ukraina, Franca dhe Gjermania duke lënë jashtë Shtetet e Bashkuara dhe Britaninë e Madhe. Mbetet ende e paqartë nëse Perëndimi do ta pranojë këtë format teksa në Lindje të Ukrainës luftimet janë intensifikuar.
Këto pamje tregojnë momentet kur ministri i Brendshëm i Ukrainës dhe një grup zyrtarësh e gazetarësh që e shoqëronin gjatë një vizite në zonat e konflikti, përpiqen t’i shpëtojnë bombardimeve me artileri prej militantëve pro-rusë.
Konflikti ka shënuar edhe viktimat e para. Të paktën 2 civilë u vranë nga predhat e ushtrisë ukrainase në Luhansk. Më herët 2 ushtarë të Kievit u vranë dhe 4 të tjerë u plagosën, teksa në rajonet separatiste është shpallur mobilizimi i përgjithshëm për luftë kundër trupave ukrainase.
Edhe Presidenti ukrainas Volodimir Zelenski bëri thirrje për një armëpushim të menjëhershëm. Sekretari Amerikan i Shtetit Antoni Blinken u shpreh se ishte i gatshëm të takohej sërish gjatë javës së ardhshme me homologun rus Sergei Lavrov nëse Rusia nuk sulmon Ukrainën.
Mediat amerikane raportojnë se ndërkohë Putin e ka dhënë urdhrin për të sulmuar Ukrainën. Përpjekjet e Perëndimit janë goditur nga një vendim i fundit që Rusia mori për të zgjatur qëndrimin e mbi 30 mijë forcave në Bjellorusi edhe pse stërvitjet e parashikuara përfunduan të dielën.
