Shqipëria e futbollit fitoi të hënën 3-0 kundër Andorrës në Tiranë, sfidë kjo e vlefshme për Grupin K kualifikues të Kupës së Botës. Pas humbjes në Angli, tanët reaguan dhe siguruan tri pikët e para në grup, kjo në sfidën e dytë.
Tanimë mendja është në datën 7 qershor, ku në Tiranë mbërrin Serbia dhe kjo do jetë më shumë se një ndeshje futbollit. Trajneri Sylvinho në konferencën zyrtare për shtyp tha se ekipi reagoi mirë dhe që tani janë duke bërë planet për Serbinë.
“Dy ndeshjet e para kualifikuese – Gjithçka është shumë e shpejtë, ky është një grup i vështirë. Ishte një detyrim fitorja me Andorrën për të arritur dhe qëndruar në lojë dhe ekipin e Andorrës e njohim mirë pasi kemi luajtur më përpara, është një ekip që luan me zemër.
Pas Anglisë, arritëm të bëjmë një ndeshje të mirë, pavarësisht se mendoj që edhe atje luajtëm mirë. Bëmë disa ndryshime strategjike edhe për arsye të lodhjes së lojtarëve, mendoj që e kemi merituar dhe kemi disa kohë që nuk kemi fituar ndeshje të tilla dhe me rezultat të mirë. Tani shohim përpara për qershorin.
Kundërshtarët, që mbylleshin shumë mirë në mbrojtje, kanë bërë shumë mirë. Kualifikimi në Botëror është pak më ndryshe dhe më i vështirë, duhet të bëjmë më shumë për të arritur aty. Sot ishim pak më tepër në presion pasi ishte një ndeshje që duhet ta fitonim dhe nëse nuk do të merrnim tri pikë do të bëhej më e vështirë në vazhdim.
Strategjikisht mendoj që kemi bërë një punë shumë të mirë, lojtarët kanë bërë shumë mirë dhe kanë sakrifikuar shumë edhe në ndeshjen në ‘Uembley’, ku rikujtoj që Anglia është një kombëtare që ka luajtur finalet e dy Europianëve të fundit. Në qoftë se nuk vrapon, krijon aksione dhe mbrohesh mirë mund të pësosh 5 gola, mendoj që lojtarët kanë bërë shumë mirë.
Serbia – Përsa i përket kundërshtarit të ardhshëm duhet të fillojmë ta studiojmë që tani, por jam i lumtur që kam shumë lojtarë me karakteristika të ndryshme të cilët kanë dëshirën për të qenë pjesë e Kombëtares dhe për të luajtur që mund t’i përdorim në varësi të kundërshtarëve”, tha Sylvinho.
