Një vullkan i madh nënujor rreth 400 kilometra larg bregut të Oregonit, i njohur si Axial Seamount, po tregon shenja të forta se është gati të shpërthejë, sipas shkencëtarëve nga Universiteti i Uashingtonit.
I vendosur rreth 1,4 kilometra nën sipërfaqen e oqeanit, vullkani gjendet në një pikë të nxehtë gjeologjike dhe mbi kurrizin e Juan de Fuca, ku dy pllaka tektonike ndahen, duke krijuar presion të vazhdueshëm nëntokësor. Gjatë javëve të fundit, janë regjistruar qindra tërmete në ditë, një tregues i qartë se vullkani po mbushet me magmë dhe mund të shpërthejë së shpejti.
Profesor William Wilcock, gjeofizikan detar, tha se shpërthimi mund të ndodhë në fund të këtij viti ose në fillim të vitit 2026, por mund të ndodhë edhe nesër.
Gjatë shpërthimit të fundit në prill 2015, u regjistruan mbi 10 000 tërmete brenda 24 orëve dhe magma u përhap 40 kilometra përgjatë dyshemesë së detit. Krateri i krijuar nga shembjet e dhomës së magmës është shndërruar në një shtëpi krijesat nënujore, të cilat kanë lulëzuar nga gazrat mineralë të dalë përmes burimeve hidrotermale.
Sipas profesoreshës Debbie Kelley, edhe pse shpërthimet janë të nxehta dhe shkatërrojnë jetën përreth përkohësisht, ajo rikthehet shpejt, brenda pak muajsh. Kelley thekson se vëzhgimi i kësaj zone është thelbësor për të kuptuar mënyrën se si formohet planeti ynë.
Për herë të parë, shpërthimi i ardhshëm do të transmetohet drejtpërdrejt për publikun, falë teknologjisë së observatorit Regional Cabled Array.
Shkencëtarët gjithashtu po studiojnë ndikimin e forcave të hënës dhe të baticës, që duket se kanë rol në shkaktimin e shpërthimeve, pasi të tre shpërthimet e fundit ndodhën gjatë muajve janar-prill. (A2 Televizion)
