Qeveria e Qipros ka përshëndetur dorëheqjen e të dërguarit tregtar të Mbretërisë së Bashkuar në Turqi, Afzal Khan, pas vizitës së tij në pjesën veriore të ishullit të pushtuar nga turqit, duke e cilësuar atë si një “mesazh të fuqishëm” ndaj çdo tolerance ndaj entitetit që nuk njihet nga asnjë vend përveç Turqisë, raporton The Guardian.
Khan, deputet i Laburistëve për Manchester Rusholme, kishte vizituar më 8 gusht zonën e vetëshpallur të pavarur, duke u takuar edhe me liderin e saj, Ersin Tatar. Ai e mbrojti udhëtimin si një vizitë “në kapacitet personal gjatë pushimit parlamentar”, por nën presionin e kritikave pranoi të jepte dorëheqjen për të mos “shqetësuar punën e qeverisë britanike për arritjen e marrëveshjeve më të mira tregtare”.
Ministria e Jashtme e Qipros e cilësoi vizitën e tij si “të paligjshme, të papranueshme dhe provokuese”, duke shtuar se vendimi për dorëheqje tregon qartë se “nuk ka hapësirë për tolerim”.
Ishulli i Qipros është i ndarë që prej vitit 1974, kur një grusht shteti i mbështetur nga junta ushtarake greke solli ndërhyrjen ushtarake të Turqisë, e cila pushtoi 37% të territorit. Në vitin 1983, veriu i pushtuar shpalli njëanshmërisht pavarësinë, e cila u shpall “juridikisht e pavlefshme” nga Këshilli i Sigurimit i OKB-së, dhe deri sot nuk është njohur nga asnjë shtet tjetër përveç Turqisë.
Kundërshtime ndaj vizitës së Khan erdhën edhe nga komunitetet e diasporës qipriote në Mbretërinë e Bashkuar, të cilët e cilësuan atë veprim “thellësisht të papërshtatshëm”, pasi përkoi me 51-vjetorin e pushtimit turk dhe me përpjekjet e OKB-së për rifillimin e bisedimeve për ribashkimin e ishullit.
Ndërkohë, lideri turko-qipriot Ersin Tatar e dënoi presionin ndaj Khan, duke thënë se vizita ishte bërë me ftesën e tij dhe se dorëheqja “është një sinjal shqetësues për të gjithë ata që besojnë në demokraci dhe barazi”.
