Republika turke e Qipros Veriore vendosi sot të pezullojë fluturimet që mbërrijnë në aeroportin e saj kryesor dhe të vendosë kufizime të reja në disa zona, përballë rritjes së rasteve të reja të COVID-19 në vend.
“Fluturimet që mbërrijnë në aeroportin Ercan do të pezullohen nga mesnata e së mërkurës deri më 13 shtator”, njoftoi Autoriteti i Aviacionit Civil.
Qipro Veriore dekretoi të shtunën një karantinë të detyrueshme prej minimumi shtatë ditësh për të gjithë pasagjerët që mbërrinin në territorin e saj.
Megjithatë, përballë hapësirës së pamjaftueshme në dispozicion për të strehuar personat në karantinë, autoritetet lokale vendosën të pezullojnë fluturimet e mbërritjes për katër ditë.
Autoritetet vendase shtrënguan, gjithashtu, të martën kufizimet e vendosura për të frenuar përhapjen e koronavirusit të ri, duke mbyllur klubet e natës, kinematë, teatrot dhe kazinotë, si edhe parqet dhe terrenet e lojërave deri në tetor.
