Sot u zhvillua seanca e parë për këtë sesion parlamentar e komisionit hetimor për koncesionet në Shëndetësi atë të Sterilizimit dhe Check Up.
Për koncesionin e Sterilizimit është thirrur dhe është përgjigjur sot si dëshmitar, ish-drejtori i QSUT-së Enekel Joti. Kryetarja e komisionit, Albana Vokshi e ka pyetur Jotin për raportin e KLSH-së në 2019-ën ku thuhet se ambienti prej 700 metrash katrorë i ishte vënë koncesionarit në QSUT për të bërë procesin e sterilizimit pa marrë pagesë qiraje mujore.
Nga ana tjetër, Joti i cili ka qenë edhe drejtues i QSUT asokohe, tha se çdo rekomandim i KLSH-së është marrë për bazë dhe se institucioni që ai drejtonte ka informuar ministrinë e Shëndetësisë si institucioni përgjegjës për firmosjen e kontratës.
Pjesë nga dëshmia e Jotit në komision:
Vokshi: Cilat investime ishin bërë nga koncesionari?
Joti: Ne monitoronim zbatimin e pikave që kanë pasur në kontratë për t’i dhënë shërbim QSUT.
Vokshi: I referohem njërit prej auditimeve të bëra në QSUT nga ju kur ishit kreu i KLSH në 2019-ën. Janë bërë një sërë vërejtjesh, po ashtu ka qenë gjetje e KLSH se ju i keni dhënë koncesionarit më shumë se 700 metra katrorë pa qira. A keni marrë ju masat e duhura për zbatimin e rekomandimit të KLSH?
Joti: Nuk e di a e keni marrë kontrollin e KLSH për zbatimin e rekomandimeve të KLSH. Dhënia pa qira ka qenë e përcaktuar në kontratë. Gjetja e KLSH ka qenë që ministria e Shëndetësisë të rishikojë mundësinë e futjes së qirasë. Kjo ka qenë detyrë e ministrisë.
Vokshi: Në cilin nen të kontratës parashikohet që lihet falas?
Joti: Nëse më lini kohë mund të pyes sepse nuk isha i përgatitur për këtë gjë.
Vokshi: Jeni thirrur për koncesionin e sterilizimit. Për këtë do bëheshin të gjitha pyetjet jo për gjëra të tjera. Në cilin nen thuhet që QSUT duhet të lërë falas në dispozicion të koncesionarit këtë ambient prej 700 metrash katrorë? Sepse unë nuk e kam lexuar një gjë të tillë.
Joti: KLSH rekomandoi që kontrata e qirasë duhet të paguhet nga koncesionari, e ka lënë detyrë te drejtori që duhet ta raportonte tek ministria dhe kjo gjë ka ndodhur.
Vokshi: Është gjetur shkelje dhënia pa qira për kryerjen e procedurave të sterilizimit pajisjeve mjekësore. Ndërkohë ambientet janë të QSUT apo spitaleve të tjera.
Joti tha se nuk ka pasur asnjë reagim nga ana e ministrisë së Shëndetësisë mbi këtë gjetje të raportit të Kontrollit të Lartë të Shtetit. Në diskutime Vokshi tha se dhënia e ambientit pa pagesë qiraje është dëm për buxhetin e shtetit.
