Radari i vendosur në ishullin e Sazanit parashikohet të furnizohet me energji nga një impianti fotovoltaik.
Në faqen e Agjencisë së Prokurimit Publik, është botuar objekti i një kontrate të Ministrisë së Mbrojtjes për çeljen e një procedure prokurimi.
Sipas dokumenteve tenderi ka si qëllim hartimin e infrastrukturës së furnizimit me energji elektrike gjatë ditës nëpërmjet shfrytëzimit të energjisë diellore.
Në dokumente specifikohet se aktualisht konsumi mesatar i energjisë elektrike tek Radari është 5-7 kwh.
Sipas Ministrisë ky projekt ka avantazhe ku së pari pozicioni gjeografik i zonës së Sazanit e bën një zonë shumë të favorshme për të shfrytëzuar ditët e shumta me diell për prodhimin e energjisë elektrike me një kosto shumë të ulët nga panelet diellore.
“Jetëgjatësia e madhe mbi 25 vjet e paneleve dhe nevoja shumë e vogël për mirëmbajtjen e bën këtë projekt shumë eficent dhe me leverdi” thuhet në dokument.
Punimet për këtë projekt parashikohet të zgjasin 5-7 javë. Fondi limit për këtë procedurë është llogaritur në 14.2 milionë lekë.
