Kryeministri shqiptar, Edi Rama në një bashkëbisedim me banorët e Thumanës për projektet e rindërtimit u shpreh se “banesat individuale do të ndërtohen të gjitha dhe do të jenë gati deri për Vit të Ri. Godinat me disa kate pak më shumë nevojë për durim se duan pak më shumë kohë. Se nuk është njësoj”.
Megjithatë, theksoi Rama, “çfarë patë këtu, do bëhet atje, dhe do të jetë më e bukur atje se kjo që patë këtu. Kjo ju siguroj”.
Po ashtu, shtoi Rama, “këtu nuk është e dukshme pjesa e hyrjes. Kur hyn këtu në Thumanë është sikur hyn në ndonjë xhep fals që ke frikë se mos humb dhe s’del më. Të gjithë vijnë lënë makinat aty, një rrëmujë dhe s’merret vesh. Ne do ta ndryshojmë atë pjesë aty, do të jetë tamam një qendër e një qyteze”.
“Do të jetë qytezë, sepse do të ketë të gjitha shërbimet. Do të ketë edhe një bibliotekë për fëmijët, edhe për ata që duan të kalojnë kohën në bibliotekë, do ketë edhe terrene sportive, fushën e futbollit, do ta ketë shumë më të mirë se kjo që është aty, edhe disa fusha të tjera, edhe një park lodrash për fëmijët, edhe për të moshuarit”, tha Rama.
Dhe sigurisht, shtoi Kryeministri, “do të ketë shumë më tepër arsye për ta zhvilluar biznesin e vogël pak më shumë. Ju keni disa biznese të vogla këtu, por janë vetëm në shërbim të komunitetit”.
“Çfarë ndodh në Belsh sot. Belshi ishte një tmerr, iknin të gjithë. Në Belsh sot nuk ka më mundësi, nuk gjen dot vend për t’u ulur nëse shkon të shtunë e të dielë, sepse shkojnë shumë njerëz për të kaluar fundjavën. Dhe çfarë ka Belshi më shumë. Asgjë. Është e njëjta strukturë, liqeni, një qytezë edhe fushat përreth. Këtu tani do të ndodhë e njëjta gjë”, tha Rama.
“Në Belsh po hapen në mënyrë të vazhdueshme biznese të vogla që u shërbejnë jo më komunitetit, por u shërbejnë atyre që vijnë vizitorë. Ju keni shumë njerëz në emigracion. Dhe kjo do jetë një arsye që të fillojnë ta kthejnë pak kokën dhe kursimet e tyre të fillojnë t’i investojnë në bujtina për mikpritje, agroturizëm etj.”, theksoi Rama./ATSH/
