Zyra e kryeministrit grek, Kyriakos Mitsotakis ka dhënë detaje nga diskutimet gjatë takimit me kryeministrin Edi Rama.
Dy homologët folën për pakicën greke në Shqipëri, ndërsa theksi u vu në forcimin e marrëdhënieve dypalëshe ekonomike dhe tregtare.
Mediat greke shkruajnë se gjatë darkës, Mitsotakis diskutoi me homologun e tij shqiptar zhvillimet aktuale në Mesdheun Lindor, me theks në veprimet e Athinës për të kufizuar EEZ me Italinë dhe Egjiptin.
Po ashtu, thuhet se u ra dakord të punohet në mënyrë që të dy vendet të zgjidhin shpejt çështjet e pazgjidhura në të kaluarën, por nuk jepen detaje nëse është diskutuar specifikisht për çështjen e kufirit detar.
“Diskutim i veçantë u bë për Pakicën Kombëtare Greke në Shqipëri, e cila duhet të jetë një urë miqësie dhe bashkëpunimi midis dy popujve, ndërsa theksi u vu në forcimin e marrëdhënieve dypalëshe ekonomike dhe tregtare. Rama e Mitsotakis shprehën kënaqësinë e tyre për integrimin e përkryer të qetë të qytetarëve shqiptarë që jetojnë në Greqi.
Në fund, ata ranë dakord të punojnë së bashku në mënyrë që të dy vendet të zgjidhin shpejt çështjet e pazgjidhura në të kaluarën në një kontekst dypalësh dhe të lëshojnë potencialin e madh që mund të krijojë marrëdhënia strategjike midis dy vendeve”, bën të ditur zyra e kryeministrit Mitsotakis.
