Vijon përplasja verbale mes kryeministrit Edi Rama dhe politikanit britanik Nigel Farage, teksa kreu i qeverisë shqiptare ka reaguar sërish ndaj deklaratave të deputetit mbi komunitetin shqiptar në Britaninë e Madhe.
Në një postim në rrjetin social “X“, Rama ironizon pa hezitim pretendimet e Farage, i cili ka kaluar nga shifra “1 në 50 shqiptarë në burg” në “1 në 3, apo ndoshta 1 në 4”.
“Vërtet? Nuk e di?”– pyet Rama, duke vënë në dyshim jo vetëm vërtetësinë, por edhe seriozitetin e deklaratave të tij.
Kryeministri i referohet të dhënave zyrtare nga Ambasada Shqiptare në Mbretërinë e Bashkuar, duke sqaruar se numri i shqiptarëve në Britani nuk është 53 mijë, siç është përmendur në analizën e Telegraph, por mbi 300 mijë. “Këta janë njerëzit që mësojnë fëmijët tuaj, ndërtojnë shtëpitë tuaja, kujdesen për të moshuarit dhe të sëmurët tuaj”, thekson Rama.
Duke e quajtur retorikën e Farage një propagandë post-Brexit, ai nënvizon se pretendimet e këtij të fundit nuk janë statistika, por taktika të frikshme që shiten si të dhëna.
“Britania është tashmë e madhe, jo më pak falë diversitetit, rezistencës dhe forcës së saj multikulturore. Një komb në stres politik post-traumatik nuk ka nevojë për kokë turku, por për të vërteta, jo mite,” shkruan Rama.
Në fund të mesazhit të tij, i drejtohet Farage me ironi të hollë.
“Shpresoj që vizita jote në Shqipëri të të frymëzojë të luftosh për ide, jo kundër njerëzve. Të mirëpres si i ftuar nderi në vendin tonë të bukur, por para se të shijosh diellin e vërtetë dhe mikpritjen tonë të sinqertë, mund të biem dakord që të flasim me fakte, jo me fantazitë e tua? Le ta caktojmë datën“, përfundon kreu i qeverisë./t
