Kryeministri i Shqipërisë, Edi Rama, në përmbledhjen e punës së Qeverisë që ai drejton për gjashtëmujorin e parë të këtij viti, ka nënvizuar edhe prioritetet në fushën e turizmit dhe infrastrukturës për periudhën shtator 2019 – korrik 2020.

Shefi i Qeverisë shqiptare nuk është shprehur entuziast me bilancet në sektorin e turizmit gjatë kësaj periudhe, ndonëse është shënuar rritje me 11% të vizitorëve të huaj apo me 2.13 milionë në total, shkruan sot Koha Ditore.

“Është një rritje 11% krahasuar me 6-mujorin e parë të vitit të shkuar. Sot që flasim, në Shqipëri rezultojnë 220 hotele më shumë, pra, të çelura në dispozicion të infrastrukturës së mikpritjes, sesa një vit më parë. Por dua ta theksoj se nuk mjafton dhe vazhdojmë të punojmë intensivisht për të siguruar një volum të konsiderueshëm investimesh të huaja të turizëm. Tanimë kanë filluar hotelet me 5 yje të nënshkruajnë kontratat dhe jemi duke diskutuar intensivisht për disa projekte të mëdha, të cilat uroj që të mundë të fillojmë t’i materializojmë si kontrata në pjesën tjetër të këtij viti. Lejomëni që të mos jap më shumë informacion për këtë, sepse janë negociata që zhvillohen në konfidencialitet, sipas kërkesës së sipërmarrësve, të investitorëve të huaj që hyjnë në investitorët e mëdhenj të tregut global të turizmit”, ka deklaruar Rama.