Kryeministri Edi Rama i dhuroi homologes italiane Giorgia Meloni një shall për ditëlindjen e saj, teksa të dy ndodhen në Abu Dhabi, ku nënshkruan marrëveshjen Shqipëri – Emiratet Arabe – Itali për investimin në lidhjen nënujore të rrjetit të shpërndarjes së energjisë në detin Adriatik, si edhe për investimet në rritjen e prodhimit nga burimet e rinovueshme në vendin tonë.
Në një video të publikuar nga Rainews, Rama shihet teksa ulet në gjunjë dhe i bën dhuratën e 48-vjetorit Melonit. “Nuk duhet ta bëni më këtë”, citohet t’i ketë thënë Rama-Melonit, pasi edhe më parë kryeministri shqiptar është parë të ulet në gjunjë para mikes së tij italiane. Më pas të dy janë përqafuar.
Sipas Rainews, Rama i ka shpjeguar Melonit se shalli që i bëri dhuratë është realizuar nga një artizan italian, i transferuar në Shqipëri, siç kanë bërë shumë bashkëkombas të saj në vitet e fundit.
Në fund, Rama ia vendosi mbi kokë shallin kryeministres italiane, e cila e falënderoi për dhuratën.
