Kryeministri i Shqipërisë, Edi Rama në konferencën vjetore ka sjellë në vëmendje krizën energjetike duke e cilësuar si një problem botëror.
Rama ka shtuar se Kosova është në hall energjetik.
“Ne e kemi ndihmuar Kosovën edhe deri pak ditë më parë, nuk është hera e parë. Kosova realisht është në hall. Sa herë do jetë e mundur do ta ndihmojmë patjetër. Nga ana jonë ne nuk do bëjmë kufizime. Gjërat duhen parë në gjysmën e dytë ët vitit të ardhshëm si do zhvillohen ngjarjet në kuptimin global”, tha Rama.
Ditë më parë, Rama në Twitter kishte thënë se do të ndajnë rrymë për Kosovën aq sa kanë mundësi, për festat e fundvitit.
“Shqipëria s’e ka aspak të lehtë mbrojtjen e vijueshme të familjeve e sipërmarrjeve të vogla nga dallga e tërbuar e krizës energjetike që po kërcënon çdo vend, por në sekëlldira të mëdha apo në gëzime popullore siç është Viti i Ri, ne s’mund të mos e ndajmë me Kosovën aq sa kemi!”, kishte shkruar Rama.
Ndryshe, deputetët e Kuvendit të Kosovës kanë votuar vendimin e Qeverisë për shpalljen e gjendjes emergjente me energji elektrike.
Qeveria e Kosovës gjatë mbledhjes së 51-të ka marr vendim që ta shpallë emergjente gjendjen energjetike, e cila do të vlejë për 60 ditë.
