“Qeveria shqiptare do t’i qëndrojë zotimit për vaksinimin e mjekëve të spitalit COVID të Prishtinës”, deklaroi sot Kryeministri Edi Rama, nga Rinasi ku priti dozat e para të vaksinës kundër virusit COVID-19 të siguruara nga marrëveshja e drejtpërdrejtë e qeverisë shqiptare me kompaninë “Pfizer”.
Rama tha se për shkak të rregullave strikte të kompanisë “Pfizer” nuk lejohet dërgimi i vaksinave në Kosovë, por shtoi ai, ne mund të mirëpresim 50 mjekët e spitalit COVID të Prishtinës për t’u vaksinuar, kurdo ata të jenë të gatshëm.
“Kemi marrë një zotim për të ndihmuar Kosovën. Por dua të sqaroj se rregullat strikte dhe kufizimet e forta që kompania ka vendosur, siç kanë bërë nga njëra anë që ne të mbetemi strict për mbajtjen e sekretit për origjinën e vendit për dozat e bëjnë të pamundur që ne të dhurojmë doza vaksinash, por nuk e bëjnë të pamundur që ne të ofrojmë vaksinim për një numër mjekësh e infermierësh, siç e kemi premtuar, gjë që do të bëhet këtu në territorin e Shqipërisë”, tha Rama.
Kryeministri informoi se kishte autorizuar Ministren e Shëndetësisë dhe Mbrojtjes Sociale për të komunikuar me homologun nga Kosova për të mundësuar vaksinimin, kurdo që ata të jenë gati.
“Ne jemi të gatshëm të mikpresim menjëherë 50 bluza të bardha nga spitali COVID i Prishtinës për të dyja dozat”, u shpreh Rama./ATSH/
