Kryeministri Edi Rama bëri të ditur detaje nga takimi që pati në Francë me Presidentin Macron lidhur me vendimin për hapjen e negociatave.
Gjatë një interviste televizive, Rama tha se “Presidenti francez e ka qëndrimin publik dhe nuk ka asgjë për të hamendësuar në këtë aspekt. Ai mendon se është koha për të reformuar BE-në dhe debati im me Presidentin është që ndërkohë që BE reformohet i duhet dhënë mundësia edhe Shqipërisë edhe Maqedonisë së Veriut që të thellojnë reformat e tyre përmes procesit të integrimit”.
“Por e rëndësishme është që kjo nuk varet më nga ne dhe çfarë kemi bërë ne, por nga një qasje e përbashkët e Këshillit Europian, ku duhet të krijohet konsensus, përndryshe një qasje e ndryshme e një vendi për interesa të tjera legjitime, për dinamika të brendshme apo për vizione alternative të Europës, mund të pengojë vazhdimin e procesit”, deklaroi Kreu i Ekzekutivit.
Rama sqaroi se “me Gjermaninë nuk kishim pengesën e e kësaj natyre, kishim një pengesë të një natyre tjetër, por me durim, punë dhe fakte u tejkalua”.
Përsa i përket vendeve skeptike si Holanda dhe nëse ka një lobim intensiv, Rama tha se “nuk ka asnjë mundësi që të ketë një lobim efektiv për sa kohë janë qëndrime që nuk lidhen fare me Shqipërinë pavarësisht se kamuflohen me lloj- lloj alibish ku padrejtësisht cenohet Shqipëria në këtë rast. Janë qëndrime që lidhen me dinamika të brendshme me interesa të brendshme të shteteve të caktuara”.
“Unë them se asgjë nuk është e përfunduar dhe do të shohim deri në fund se si do të zhvillohet procesi pasi nuk shoh një qëndrim të prerë kundër mundësisë për të krijuar një konsensus pozitiv që të na japë mundësi që ta vazhdojmë procesin formalisht edhe pse procesi vazhdon , pasi që vjet jemi duke bërë me KE ç’ka vendet, edhe ne edhe Maqedonia e Veriut bëjnë kur hapen negociatat” tha ai. /
