Mungesa e krahut të punës është një problem serioz në sektorin e turizmit. Kështu bëri me dije kryeministri Edi Rama, gjatë prezantimit të Kalendarit Kombëtar Turistik të ngjarjeve kulturore, sportive dhe të traditës dhe aplikacionin e tij TEA (Tourism Events of Albania).
Sipas Ramës, kërkesa për punonjës, qoftë të kualifikuar apo të pakualifikuar, është e madhe, duke theksuar se për të zgjidhur këtë problematikë nevojitet zgjerim i hapësirës për të marrë punonjës edhe jashtë Shqipërisë.
Ndalur te pagat, Rama u shpreh se në këtë industri rrogat janë shumë konkurruese, teksa shtoi se do të përmirësohen akoma edhe më shumë.
“Problemi në industrinë e turizmit është krahu i punës. Ka shumë kërkesë nga industria për punonjës që nga ata më të pakualifikuar te ata më të kualifikuar dhe ka gjithnjë nevojë për të zgjeruar hapësirën e kërkesës përtej kufijve të Shqipërisë sepse ky është një problem gjithnjë e më serioz. Pagat në këtë industri janë shumë konkurruese dhe do të bëhen gjithmonë e më konkurruese edhe me industrinë turistike në Rajon”, u shpreh Rama.
