Kryeministri Edi Rama në vijim të vizitës së tij zyrtare në Shtetet e Bashkuara të Amerikës ka zhvilluar një takim në Shtëpinë e Bardhë me Këshilltarin e Presidentit Trump për Sigurinë Kombëtare, Robert O’Brien.
Kryeministri Rama ka publikuar një foto nga takimi ku thekson se, “në Shtëpinë e Bardhë me Këshilltarin e Presidentit Trump për Sigurinë Kombëtare, Robert O’Brien, pas një bashkëbisedimi mbi të gjitha temat e interesit të përbashkët”.
Ndërsa në njoftimin e Këshillit për Sigurinë Kombëtare thuhet se, “O’Brien ishte i nderuar të takohej me kryeministrin e Shqipërisë Edi Rama ditën e djeshme. SHBA dhe Shqipëria ndajnë një angazhim të palëkundur dhe afatgjatë për të promovuar stabilitetin rajonal, përfshirë këtu përgjegjësinë për rritjen e fuqisë së NATO- s dhe luftën kundër aktiviteteve malinje të Iranit”.
