Kryeministri Edi Rama uroi me recitimin e një pasazhi nga bibla hebraike, si dhe duke kërkuar falje për daljet e shpeshta në publik.
“Nuk kam një mesazh tradicional. Kjo është nata e familjes suaj dhe mua më keni pasur çdo ditë në shtëpi. Ju kërkoj ndjesë nëse e kam tepruar, nëse nuk k folur si duhet.
Kam bërë si çdo vit gjithë sa kam mundur. Ka qenë një vit tejet i vështirë, të cilin inflacioni i luftës dhe çmendjane çmimit të energjisë e kanë bërë të zymtë.
Kemi pasur edhe ditë të mira, mes tyre dhe ditë historike, si finalja e parë europiane e futbollit në Shqipëri, apo mbajtja e Samitit të BE në Tiranë, për herë të parë jashtë kufijve të BE. Pa harruar momentin kulmor, çeljen e negociatave për anëtarësim”, tha Rama.
“Minutin tjetër do t’jua marr për t’ju lexuar një tekst të vjetër, që mua më mahnit gjithnjë dhe ndjehem sonte i privilegjuar ta ndaj me ju, nga Ekleziastët:
“Nën këtë qiell ka një kohë për gjithçka dhe ka një stinë për çdo veprim: Një kohë për të lindur e një kohë për të vdekur, një kohë për të mbjellë e një kohë për të shkulur, një kohë për të vrarë e një kohë për të shëruar, një kohë për të shembur e një kohë për të ndërtuar, një kohë për të vajtuar e një kohë për të qeshur, një kohë për zi e një kohë për valle, një kohë për t’i hedhur e një kohë për t’i mbledhur gurët, një kohë për të përqafuar e një kohë për t’u rezervuar në përqafime, një kohë për të këmbëngulur e një kohë për të hequr dorë, një kohë për të mbajtur e një kohë për të flakur, një kohë për të prishur e një kohë për të ndrequr, një kohë për të heshtur e një kohë për të folur, një kohë për të dashur e një kohë për të urryer, një kohë për luftë e një kohë për paqe”.
Qoftë Viti i Ri një kohë për paqe, për dashuri e për plot të qeshura për ju, familjen dhe miqtë e të afërmit tuaj!”.
