Mbi 500 thirrje janë pranuar nga IKSHP-ja prej dje, në telefonat e siguruar nga Ministria e Shëndetësisë në Kosovë, ndonëse shumica e tyre kanë pasur kërkesa të ndryshme shëndetësore, që nuk kanë të bëjnë me Covid-19.

Këtë e ka bërë të ditur drejtori i Institutit Kombëtar të Shëndetësisë Publike, Naser Ramadani, gjatë një konference të jashtëzakonshme për medie, me ç’rast është konfirmuar personi i tretë me koronavirus në Kosovë.

Ramadani u ka bërë apel qytetarëve që të mos vijnë në Klinikën Infektive, nëse nuk i kanë simptomat e koronavirusit, transmeton KOHA.

“Nëse i keni këto simptome, duhet të telefononi në numrat që i ka hapur Ministria e Shëndetësisë”, ka thënë ai.

Ramadani ka treguar se të premten Instituti Kombëtar ka punuar në vazhdimësi të premten dhe ka pasur kontinuitet të shfaqjes së rasteve dhe kërkesave të njerëzve që kanë ardhur për t’u testuar, edhe të atyre që nuk kanë pasur simptome të virusit, por kanë qenë të shqetësuar.

Ramadani ka bërë të ditur se të premten, janë testuar gjithsej 45 raste, dy prej të cilëve kanë rezultuar pozitivë, e më vonë pas mesnatës edhe i treti.

“Në këtë mënyrë, Instituti ka rrumbullakuar 140 raste të testuara, prej të cilave tri kanë dalë pozitivë”, ka thënë ai.

Ramadani ka përshkruar simptomat e koronavirusit: temperaturë mbi 38 gradë Celsius, kollitje të thatë, dhembje fyti dhe vështirësi në frymëmarrje.

“Nuk duhet të paraqiten pa këto shenja në Klinikën Infektive”, ka thënë ai.

“Edhe nëse i kanë këto shenja”, ka vazhduar ai, “tashmë ministrja e Shëndetësisë ka siguruar pesë telefona dhe do të sigurojë pesë tjera, të vendosura në Institutin Kombëtar”.