Janë dashur disa muaj që Sergio Ramos të hynte në fushën e lojës qëkur u transferua nga Real Madridi te Paris Saint-Germaini. Por nuk zgjati shumë që mbrojtësi veteran ta bënte atë që bën më së miri, të përjashtohet nga loja.
Në vetëm tri paraqitje në Ligue 1 qëkur u transferua në Francë në muajin korrik, Ramosit iu tregua kartoni i parë i kuq me skuadrën e re të mërkurën në mbrëmje në barazimin 1:1 me Lorientin.
35-vjeçari hyri në lojë në pjesën e dytë dhe nuk e priti fundin e ndeshjes. Mori dy kartonë të verdhë brenda pesë minutave. U përjashtua nga loja në minutën e 86-të pasi ndali një vrapim të sulmuesit të Lorientit, Teremas Moffi.
Ishte goli i Mauro Icardit në minutën e parë të kohës shtesë që e shpëtoi skuadrën parisiene pa pësuar disfatë. Tani PSG-ja ka 13 pikë më shumë se përcjellësi i parë në tabelë, pas 19 xhirove.
Ramos ka zhvilluar vetëm 130 minuta në ligë dhe 45 minuta në Kupën e Francës në këtë sezon.
Kartoni i kuq kundër Lorientit ishte i 27-ti në karrierën e tij dhe i pari në afër dy vjet. Herën e fundit kur u përjashtua nga loja me të kuq ishte shkurti i vitit 2020 në Ligën e Kampionëve kundër Manchester Cityt.
26 kartonët tjerë të kuq të Ramosit erdhën gjatë qëndrimit për 16 vjet te madrilenët. I pari ishte ai i vitit 2005 në muajin shtator kundër Espanyolit.
Rekordin për më së shumti kartonë të kuq e mban kolumbiani Gerardo Bedoya, me plot 46 përjashtime gjithsej. Pati karrierë 20-vjeçare në futboll dhe ka hyrë tashmë në rekordet e librit “Guinness”.
ESPN-ja në shkrimin e bërë për të ndër të tjerash ka shkruar: “Ka ende shumë punë për t’u bërë, Sergio. Ne kemi besim te ti”.