Opozita e ka komentuar si një këmbanë alarmi raportin e Kontrollit të Lartë të Shtetit, ku, sipas saj, Shqipërisë i është shkaktuar një dëm ekonomik prej 138 miliardë lekësh për vitin 2022.
Nëpërmjet një postimi në rrjetin e tij social Facebook, kryetari i Partisë së Lirisë, Ilir Meta, ka komentuar se ky dëm ka ardhur si rezultat i korrupsioni, i cili, sipas tij, “është i vetmi qëllim madhor i “Rilindjes””.
Meta informon ndër të tjera se Kontrolli i Lartë i Shtetit ka konstatuar një dëm ekonomik prej 138 miliardë lekë gjatë vitit 2022 për shkak të keqmenaxhimit të fondeve publike dhe shkeljeve ligjore, ku dëmi më i lartë prej 107 miliardë lekë lidhet me Tatimet dhe Doganat.
“Vetëm lufta e hapur dhe pa kompromis kundër korrupsionit parandalon falimentimin e Shqipërisë dhe rikthen shpresën tek të rinjtë, që në masë po detyrohen të braktisin vendin! Çlirimi i Shqipërisë nga korrupsioni dhe kapja e shtetit, si dhe rivendosja e Llogaridhënies është interesi dhe prioriteti ynë kombëtar!”- shkruan Meta.
