Sulmuesi i Kosovës, Milot Rashica, ka shënuar të shtunën golin e parë në Premier League. Por goli i Rashicës nuk ishte i mjaftueshëm për Norwich Cityn që u mposht 3:1 nga Liverpooli në “Anfield”.
Rashica në minutë e 48-të goditi nga distanca, ndërsa topi u devijua nga mbrojtësi i Liverpoolit, Joel Matip dhe përfundoi në rrjetë. Megjithatë, goli iu evidentua kosovarit. Liverpooli u përgjigj shpejt, duke shënuar tre gola për ta fituar sfidën e xhiros së 26-të të kampionatit anglez.
Rashica në 19 ndeshje në Premier League ka një gol e dy asistime. E ka edhe një gol në dy ndeshje në kuadër të Kupës FA.
Ai është shprehur i lumtur për golin e parë në kampionatin anglez.
“Jam shumë i lumtur. Por do të isha edhe më i lumtur nëse do të merrnim diçka nga ndeshja pasi vërtetë ishte e mundur. Ne vetëm duhet të qëndrojmë të bashkuar dhe të punojmë të bashkuar. Kemi disa ndeshje të rëndësishme që na presin”, ka theksuar Rashica për sajtin zyrtar të klubit.
Norwichi është i fundit në Premier League (20). I ka 17 pikë nga 25 ndeshje.
“Mendoj se po përmirësohemi çdo javë dhe ju mund ta shihni dallimin me ndeshjen e javës së kaluar. Kemi krijuar shumë raste në ndeshje. Ne kemi luajtur mirë me topin dhe jemi mbrojtur si ekip. Ishin vetëm pesë apo dhjetë minuta ku ne humbëm koncentrimin. Por në çdo ndeshje po ka gjëra pozitive”, ka shtuar Rashica.
Rashicës në pjesën e parë iu anulua një gol për pozitë jashtë loje, ndërsa një rast të mirë e lëshoi edhe Teemu Pukki.
“Mendoj se kemi filluar mirë si ekip. Kemi pasur disa raste në pjesën e parë dhe mendoj se është dashur të shënojmë një apo dy gola. Ne jemi mbrojtur si ekip dhe kemi dhënë çdo gjë nga vetja. E kemi mbajtur portën të paprekur në pjesën e parë dhe kemi nisur mirë në pjesën e dytë. Por ka ndodhur disa herë këtë edicion që i kemi dhënë ekipit kundërshtar pesë apo dhjetë minuta ku vetëm kanë sulmuar. Mendoj se kjo ndodhi edhe në këtë ndeshje. Ne e kemi ditur se ndaj kujt luajmë. E kemi ditur se sa vështirë do të jetë, por duhet të mbrohemi me më shumë fokus dhe i gjithë ekipi. Kemi nisur mirë, por më pas pranuam tre gola në periudhë të shkurtër. Mendoj se duhet të qëndrojmë të fokusuar për kohë sa më të gjatë”, ka theksuar Rashica.
Skuadra e kaluar e Rashicës, Werder Bremeni, edicionin e kaluar u largua nga Bundesliga. Tani rrugën drejt kategorisë së dytë Rashica rrezikon ta bëjë edhe në Angli.
