Sulmuesi anësor, Milot Rashica ka folur në konferencë për media para ndeshjes me Greqinë që zhvillohet në Volos.
Duke e ditur rëndësinë e ndeshjes dhe të motivuar me fitoren e fundit, Rashica ka thënë se janë të përgatitur për të dhënë maksimumin në këtë ndeshje.
“Siç e dimë është ndeshja e fundit e këtij grumbullimi dhe kjo ndeshje mund të përcaktojë gjithçka. Jemi të përgatitur për të dhënë maksimumin dhe për ta fituar këtë ndeshje”, ka thënë fillimisht Rashica.
Ai tutje shtoi se e njohin Greqinë dhe e dinë se është kundërshtar i fortë, por kanë luajtur shpesh me ta dhe i njohin.
“Presim ndeshje shumë të vështirë dhe është një kundërshtar tjetër prej ndeshjes së kaluar. Por besoj që me motivimin dhe gjërat e mira që kemi bërë ndeshjen e kaluar t’i shfrytëzojmë”.
“Kemi luajtur ndaj Greqisë dhe e dimë se si luajnë dhe shpresoj që të dielën të bëjmë shumë më mirë se në ndeshjen e fundit ndaj tyre”, ka thënë Milot Rashica.
