Pasi shmangu eliminimin nga faza e grupeve në Ligën e Kampionëve, Real Madridi do të luajë kundër Atletico Madridit me synimin për t’ia shkaktuar humbjen e parë këtë edicion në La Liga rivalit të përbetuar të qytetit.
Dueli mes Realit dhe Atleticos zhvillohet të shtunën mbrëma (21:00) në stadiumin “Alfredo Di Stefano” dhe i takon xhiros së 13-të të kampionatit spanjoll. Atletico prin në tabelë, ndonëse ka dy ndeshje më pak të zhvilluara. Ka regjistruar tetë fitore e dy barazime në dhjetë ndeshje, duke tubuar 26 pikë. Është ekipi i vetëm në La Liga që nuk di për humbje këtë sezon.
Reali ka një ndeshje më shumë se Atletico dhe zë vendin e katërt në tabelë, me 20 pikë të mbledhura. Një ditë para derbit, trajneri i Real Madridit, Zinedine Zidane, në konferencën për shtyp, pranoi se Atletico duhet të llogaritet si favoriti kryesor për titullin e kampionit këtë edicion. Ai pranoi se skuadra e Diego Simeones duhet të mposhtet, ndonëse shtoi se do të jetë vështirë për shkak të formës së mirë që po e kalon Atletico këtë edicion, ku prej 30 pikëve të mundshme ka tubuar 26.
“Po, përfundimisht, Atletico duhet të konsiderohet si favorit për titullin e kampionit. Këtë po e dëshmon edhe në fushë. Është në krye të tabelës dhe gjithmonë ka qenë konkurrent në këtë aspekt. Megjithatë, ne e njohim mirë dhe mendoj se jemi të gatshëm për derbi”, është shprehur Zidane. “Ne duam ta fitojmë secilën ndeshje dhe veçanërisht këtë ndaj Atleticos që është një derbi i madh. Ne u shpallëm kampion edicionin e shkuar dhe duam ta mbrojmë titullin e fituar. Kështu që deri në fund do të përpiqemi ta bëjmë një gjë të tillë”.
Te Reali, krahas kapitenit Sergio Ramos që u kthye ditë më parë, të gatshëm për lojë janë edhe Federico Valverde e Dani Carvajal. Ndërsa do të mungojnë Eden Hazard, Luka Joviq, Mariano Diaz e Martin Odegaard. Real Madridi në pesë ndeshjet e fundit ka dy fitore, dy humbje dhe një barazim.
“E kemi parasysh situatën tonë në kampionat dhe mendoj se dueli me Atleticon është ai i duhuri për t’u rikthyer dhe për të treguar fytyrën tonë të vërtetë”, shtoi Zidane.
Ngjashëm si Reali, Atletico, në xhiron e fundit të fazës së grupeve të Championsit, e siguroi kalimin në raundin tjetër. Në ndeshjen e fundit Atletico triumfoi në udhëtim kundër Salzburgut (2:0), për t’u konfirmuar si i dyti në Grupin A pas Bayern Muenchenit. Mirëpo, tek Atletico duan të vazhdojnë të mbeten të pamposhtur në kampionat dhe kapiteni Koke ka paralajmëruar fitore ndaj rivalit të përbetuar. Sipas tij, Atletico po kalon nëpër një formë jashtëzakonisht të mirë, të cilën duhet ta kurorëzojë me fitore në udhëtim kundër Realit. Koke pranon se përkundër startit të dobët, Reali mbetet një kundërshtar i fortë dhe që duhet të respektohet.
“Është një ndeshje emocionuese, saktësisht derbi më i madh i Madridit, por edhe futbollit spanjoll. Në këtë ndeshje speciale dua që ne të dalim fitues, edhe pse nuk do të jetë aspak lehtë. Reali ka pasur ulje dhe ngritje këtë sezon, por në derbi do të jetë i mobilizuar. Do të jetë paksa i çuditshëm, sepse është derbi i parë i Madridit që luhet pa tifozë, megjithatë ne jemi adaptuar dhe duam t’i gëzojmë mbështetësit tanë”, është shprehur Koke. “Kemi krijuar një mentalitet fituesi dhe do të synojmë ta fitojmë ndeshjen. Formën e mirë duam ta vazhdojmë edhe në derbi, në mënyrë që të konfirmohemi si kandidat për titull”.
Skuadra e Barcelonës në këtë xhiro do të ketë punë më të lehtë dhe do të mundohet të rikthehet te fitorja përballë Levantes, duel ky që luhet të dielën mbrëma (21:00) në stadiumin “Camp Nou”. Në katër ndeshjet e fundit në të gjitha garat, Barcelona ka regjistruar tri humbje dhe një fitore. Zë vendin e nëntë në tabelë me 14 pikë, pas dhjetë ndeshjeve të luajtura në La Liga. Levante gjendet shtatë pozita më poshtë në tabelë dhe ka tubuar 11 pikë.
