Përfaqësuesi i Shoqatës së Transportit Urban në Tiranë, Kostandin Foni, ka deklaruar se reduktimi i mjeteve të transportit publik ka ardhur si pasojë e nevojës financiare. I ftuar në studion e RTSH 24, Foni i bëri thirrje kryebashkiakut Erion Veliaj që të ulen së bashku me operatorët për të diskutuar mbi kërkesat e tyre.
Duke mos pasur një përgjigje zyrtare nga institucionet përgjegjëse, Foni theksoi se Unioni i Transportit Publik ka kërkuar indeksimin e biletës.
“Nga ekspertët tanë, kemi arritur në konkluzionin që çmimi duhet të shkojë drejt dyfishimit dhe duhet të ketë subvencionim për këtë çmim të munguar.
Subvencionimi ka ndodhur për aq mjete sa bashkia kërkon ekstra për t’i nxjerrë në punë. Të jep subvencionim për mjetet e bashkuara që ka bërë bashkia për t’i ofruar një shërbim qytetarëve. Është subvencionim për të mbuluar kostot e shtuara nga ana e bashkisë, por jo për operatorët që të investojnë në flotën e tyre dhe në përmirësimin e kushteve që kanë mjetet.
Ne jemi të hapur në çdo moment. Të ulemi në një tryezë të përbashkët ku kryetari i bashkisë të thërrasë operatorët. Nuk jemi këtu për reduktim dhe mbyllje shërbimi. Reduktimi vjen nga mungesa financiare e operatorëve,” tha ai.
Sa i përket rasteve të aksidenteve të autobusëve publik në kryeqytet, Foni u shpreh se në 90% të rasteve nuk është faji i urbanëve, por i mungesës së infrastrukturës.
“Ne i kemi bërë thirrje dhe Policisë rrugore që daljet e tyre të jenë sa më të shpeshta për përdorimin e alkoolit nga shoferët. Mungesa e infrastrukturës sjell aksidente.
Përgjegjshmëria e çdo punonjësi që merr mjetin është individuale dhe nëse përdor alkool duhet dënuar”, u shpreh Foni.
Unioni i Transportit Publik njoftoi dy ditë më parë (31 korrik) se linjat e transportit publik në Tiranë do të funksionojnë me mjete të reduktuara. Si shkak për reduktimin e mjeteve të transportit publik në qarkun e Tiranës citohen “sfidat dhe shqetësimet financiare” më të cilat janë përballur.
Sipas Unionit të Transportit Publik, institucionet duhet të ndërhyjnë për të shmangur indeksimin e çmimit të biletës, çka do të rëndonte direkt në xhepat e qytetarëve. Një masë e tillë mund të kalohet vetëm me vendim të këshillit bashkiak. Unioni i Transportit Publik u kërkon autoriteteve qendrore e vendore të ulen për dialog, përndryshe shërbimi i transportit do të vijojë të ofrohet i reduktuar.
Pas deklaratë reagoi kryebashkiaku Erion Veliaj, i cili paralajmëroi se qëndrimi ndaj cilësdo linjë që ndërmerr një vendim të tillë do të jetë i ashpër deri në heqjen e licencës.
