“Ne po punojmë që brenda vitit të përmbyllim atë pjesë të reformës zgjedhore që ka lidhje me rekomandimet e OSBE/ODIHR-it, ndërsa për çështjet që kërkojnë edhe më tepër kohë në zbatim le të diskutohet në një fazë të dytë”, deklaroi sot deputeti i Partisë Socialiste, Alket Hyseni.
I ftuar në një studio televizive, Hyseni tha se “ne kemi kërkuar të adresojmë rekomandimet e OSBE/ODIHR-it në mënyrë të menjëhershme”.
“Përtej kësaj ka disa si kërkesa si ajo e PS-së për votimin e emigrantëve, kërkesa e opozitës parlamentare për sistemin, apo edhe kërkesa nga opozita joparlamentare të cilat ne jemi të hapur për t’i diskutuar por nuk kanë lidhje me standardin e zgjedhjeve”, tha Hyseni
Sipas tij, “këto kërkesa kanë të bëjnë me këndvështrime të ndryshme, por nuk kanë lidhje me standardet, rekomandimet e OSBE/ODIHR-it kanë lidhje me standardet”.
Hyseni tha se “ne mirëpresim propozimet e opozitës jashtëparlamentare, por duhet të kuptohet se nuk kemi paraqitur ndonjë draft të ardhur nga ne, por drafti i depozituar ka buruar nga OSBE/ODIHR”.
Ndërkohë sipas tij, “sistemi zgjedhor është gjëja më e parëndësishme dhe nuk është zgjidhja për të arritur standardet pasi në vendet e ndryshme sistemi zgjedhor është i ndryshëm dhe i përshtatet shoqërive”.
