Përzgjedhësi i Shqipërisë, Edoardo Reja, është optimist para ndeshjeve të muajit shtator, që do të zhvillohen në kuadër të kualifikimeve për Kampionatin Botëror “Katari 2022”. Madje Reja, në një intervistë për “Gazzetta dello Sport”, të premten, ka paralajmëruar se pret rezultate pozitive prej ekipit të tij. Shqipëria, në muajin shtator do t’i luajë tri ndeshje në kuadër të Grupit I eliminator. Më 2 shtator është mysafire e Polonisë, përpara se të përballet në shtëpi me Hungarinë pas tri ditësh, dhe San Marinon më 8 shtator. Të dyja këto ndeshje Shqipëria do t’i zhvillojë në stadiumin “Elbasan Arena”. Aktualisht Shqipëria është e treta në grup me gjashtë pikë pas tri ndeshjeve të zhvilluara deri më tani. Në muajin mars Shqipëria e mposhti në udhëtim Andorrën e San Marinon, por pësoi në shtëpi nga Anglia, e cila është lidere e grupit me nëntë pikë të tubuara. Andorra dhe San Marino janë në pozitat e fundit në tabelë pa pikë, Polonia është e katërta me po aq pikë, ndërsa Hungaria zë vendin e dytë në grup me shtatë pikë të grumbulluara.
“Kemi ndeshjet me Poloninë, Hungarinë e San Marinon. Nga këto ndeshje pres nga skuadra konfirmime të progresit që e kemi arritur gjatë edicionit të fundit në Ligën e Kampionëve”, është shprehur Reja.
Italiani Reja ka paralajmëruar se javën tjetër do ta nisë grumbullimin për këto ndeshje të rëndësishme, në të cilat kërkon rezultate pozitive. Në fakt, ai ka thënë se prej këtyre rezultateve Shqipëria do të jetë maksimalisht e motivuar për ndeshjen e kthimit ndaj Anglisë, të cilën e luan në Londër më 12 nëntor. Reja beson se deri te përballja me anglezët, të cilët e mposhtën Shqipërinë me rezultatin 2:0, “kuqezinjtë” do të kenë edhe fitore.
“Në pritje të sfidës së kthimit në Anglinë, objektivi ynë është që të shkojmë në këtë duel të motivuar nga një seri fitoresh e rezultatesh pozitive, gjë që është shumë e rëndësishme për ne”, është shprehur Reja, që ka insistuar se fokusi kryesor do të jetë te ndeshjet e muajit tjetër.
Në fakt, para ndeshjeve të muajit nëntor Shqipëria në tetor do të përballet me Hungarinë në udhëtim dhe Poloninë në shtëpi. Krahas Shqipërisë, edhe Përfaqësuesja e Kosovës do të luajë muajin tjetër në kuadër të kualifikimeve për Botërorin e vitit të ardhshëm. Kosova bën pjesë në Grupin B dhe është e fundit në tabelë, pasi ka dy humbje në po aq ndeshje. “Dardanët” më 2 shtator do të përballen me Gjeorgjinë, ndërsa tri ditë më vonë e presin Greqinë në stadiumin “Fadil Vokrri”.
