Republikanët në Senatin e Shteteve të Bashkuara bllokuan një masë për pezullimin e kufirit të borxhit federal, me të cilën synohej shmangia e mbylljes së qeverisë, duke u lënë Demokratëve vetëm tri ditë kohë për të gjetur një zgjidhje që qeveria të mos mbyllet të enjten, kur nuk do të ketë më fonde.
Legjislacioni i dërguar në Senat kishte për qëllim që të anashkalohen dy afate, të cilat, nëse nuk adresohen, paraqesin rrezik për ta destabilizuar ekonominë amerikane, e cila po mundohet të rimëkëmbet nga pandemia.
Për miratimin e masës u nevojitën 60 vota, por 50 senatorë ishin kundër dhe 48 pro. Demokratët tash kanë vetëm tri ditë kohë për të gjetur një mënyrë tjetër për ta vazhduar financimin e qeverisë pas ditës së enjte, shkruan The Guardian.
Mbyllja e mundshme e qeverisë do të ishte goditje e madhe për Demokratët e presidentit Joe Biden. Republikanët kanë refuzuar të votojnë për kufirin e borxhit federal, pavarësisht se Demokratët e kishin bërë këtë në kohën kur në pushtet ishte presidenti nga Partia Republikane, Donald Trump.
Udhëheqësi i pakicës në Senat, Republikani Mitch McConnell, tha se partia e tij do ta përkrahë rezolutën që e parandalon mbylljen e qeverisë, por jo edhe rritjen e kufirit të borxhit.
Në një letër për gazetarë, udhëheqësi i Demokratëve në Senat, Steny Hoyer, dhe 63 bashkëpartiakë e akuzuan zyrtarin republikan se ka prodhuar një krizë dhe se veprimi i opozitës është i rrezikshëm, jologjik dhe i papërgjegjshëm.
