“Si Shqipëria u bë kryefjala e verës për 2023!”
Ky është titulli kryesor i reportazhit të revistës britanike “The Face” që i dedikohet turizmit shqiptar dhe në foto të kopertinës ka artisten me famë ndërkombëtare, Dua Lipa.
Pavarësisht sulmeve ksenofobike ndaj emigrantëve shqiptarë, vendi është kthyer në atraksion për britanikët e rinj, duke ofruar festivale apo aktivitete të ndryshme, akomodim të lirë dhe plazhe të mrekullueshme.
“Mirë se vini në Albmania! Kroacia e re, Maldivet e Evropës, Karaibet e Evropës, Greqia tjetër – e njohur edhe si Shqipëri – po përjeton një ngritje me hapa galopantë të turizmit.”
Revista britanike në brendësi të artikullit shkruan se edhe nëse nuk keni qenë në të vërtetë në Shqipëri kohët e fundit, me siguri, keni parë pamjet në internet.
“Toka e shqiponjës është bërë gjithnjë e më e njohur për britanikët kohët e fundit. Të gjithë kanë marrë rreze në plazhet e saj me rërën e pastër, duke u zhytur në ujërat e kristalta.”
Revista britanike “The Face” nënvizon në reportazh se Shqipëria është ende një destinacion relativisht alternative për britanikët pasi aktualisht ka rreth 20 fluturime në javë, por me investimet e vazhdueshme në aeroportin e Tiranës dhe me vënien në funksion të aeroportitt të Vlorës vitin tjetër, shtimi i fluksit të turistëve do të jetë i padiskutueshëm.
Si ambasadore më të mirë dhe të famshme, revista permend edhe efektin që ka Dua Lipa tek britanikët, e cila viziton Shqipërinë shpesh, sikundër mbajti koncertin e saj vitin e kaluar.
