Eksportet e lidhura me BE-në nga portet britanike ranë me më shumë se dy të tretat në janar, të krahasuara me të njëjtin muaj në 2020, sipas të dhënave nga Shoqata britanike e Transportit Rrugor (RHA), në një raport të botuar sot në gazetën “Observer”.
“Megjithëse pandemia ende në vazhdim luajti një rol në kufizimin e tregtisë, një pjesë e konsiderueshme e reduktimit prej 68 % lidhet me dokumentat shtesë dhe kontrollet e nevojshme tani që BM nuk është më pjesë e tregut të përbashkët europian”, argumentoi RHA.
Shefi ekzekutiv i RHA Richard Burnett i tha gazetës se rënia e tregtisë ishte parashikuar nga grupi i tij, i cili i kishte kërkuar qeverisë britanike të gjente mënyra për të zvogëluar pengesat burokratike dhe për t’u siguruar që tregtia të mbetej në vazhdën e Brexit.
“Më duket thellësisht zhgënjyese dhe e bezdisshme që ministrat kanë zgjedhur të mos dëgjojnë industrinë dhe ekspertët”, theksoi ai për “Observer”.
Burnett vuri në dukje se shumë kamionë që sjellin produkte nga Europa kthehen në kontinent bosh, pasi shumë kompani britanike nuk po përpiqen as të eksportojnë në BE tani për tani.
Për më tepër, BM ka vetëm rreth 10 000 punonjës doganash në punë, rreth një e pesta e personelit që organizata e quan të nevojshme për operacione efikase.
