Presidenti i Kosovës ka nderuar Rifat Berishën me Urdhrin Hero i Kosovës.
Këtë Hashim Thaçi e bëri në 70 vjetorin e rënies së heroit. Rifat Berisha u përkujtua sot me një akademi përkujtimore, në të cilën u tha se ishte ushtarak i pamposhtur dhe figurë e rëndësishme për Ushtrinë Çlirimtare të Kosovës.
Në 70 vjetorin e rënies së tij, Rifat Berisha u përkujtua nga institucionet e Kosovës si figurë e ndritur se historisë kombëtare. Për të u tha se ishte nacionalist i palëkundshëm.
Presidenti i vendit, Hashim Thaçi tha se ndjehet krenar që në luftën e fundit në Kosovë, një nga bazamentet e UÇK-së ishte vendlindja e Rifat Berishës, fshati Berishë ku ishte i vendosur shtabi i ushtrisë.
Familjarët e heroit, pranuan nga presidenti i vendit Urdherin Hero i Kosovës.
I biri i tij, Muhamer Berisha shprehu falënderim në emër të familjes dhe tha se Kosova ka shumë njerëz si Rifat Berisha.
Për figurën e heroit Rifat Berisha ka folur edhe zëvendësministri i Mbrojtjes, Agim Ceku.
Ai tha se vendosja e shtabit të UÇK-së në fshatin Berishë nuk ishte rastësi.
Rifat Berisha nga Drenica ka qenë pjesëmarrës i Konferencës së Bujanit dhe më vonë i konferencës së Prizrenit.
Rifat Berisha nuk ishte pajtuar me vendimi që Kosova t’ i bashkohej Serbisë e Jugosllavisë dhe doli haptas kundër regjimit duke organizuar kryengritje guerile kundër UDB-së, të cilat e vrasin më 1949, së bashku me katër pjesëtarë të familjes së tij.
