Ministri i Jashtëm rus Sergey Lavrov deklaroi sot se Rusia ende nuk ka marrë asnjë sqarim zyrtar nga SHBA-ja përmes kanaleve diplomatike lidhur me deklaratat e fundit të presidentit Donald Trump për rifillimin e testeve bërthamore.
“Jo, ende nuk kemi marrë ndonjë shpjegim përmes kanaleve diplomatike se çfarë donte të thoshte Presidenti Donald Trump kur shpalli rifillimin e testeve bërthamore”, citoi agjencia shtetërore ruse TASS Lavrovin duke u thënë gazetarëve në Moskë.
Lavrov theksoi se deklaratat e zyrtarëve amerikanë pas fjalëve të Trumpit tregojnë mungesë të një kuptimi të përbashkët brenda administratës së Uashingtonit.
Më herët, presidenti Vladimir Putin deklaroi se Moska është e gatshme të kryejë teste bërthamore nëse vendet e tjera e bëjnë të parat. Këtë e tha gjatë mbledhjes së Këshillit të Sigurisë, si reagim ndaj raporteve mediatike për teste amerikane.
SHBA-ja nuk ka kryer test bërthamor që nga viti 1992, ndërsa Rusia (si pjesë e BRSS) e fundit në 1990. Putin urdhëroi zyrtarët e sigurisë të analizojnë informacionin dhe, nëse konfirmohet, të përgatisin teste ruse.
Lavrov konfirmoi sot se puna për urdhrin e Putinit të 5 nëntorit është duke u zhvilluar dhe publiku do të informohet për rezultatet.
Muajin e kaluar, zëvendëspresidenti JD Vance mbrojti nevojën për mirëmbajtje dhe testim të arsenalit bërthamor amerikan, duke e quajtur atë komponent jetik të sigurisë kombëtare.
Kjo erdhi pasi Trump urdhëroi Pentagonin të fillojë “menjëherë” teste bërthamore “për shkak të programeve të testimeve të vendeve të tjera”.
SHBA-ja dhe Rusia kanë Traktatin New START (2011), që kufizon kokët bërthamore strategjike në 1,550 për secilën palë, si dhe numrin e lëshuesve dhe bomberave në 800.
Traktati u zgjat deri në shkurt 2026 nga Biden në 2021, por Putin e pezulloi pjesëmarrjen ruse në 2023 për shkak të “qëndrimit armiqësor të Perëndimit”.
Ndërkaq, agjencia e inteligjencës së Koresë së Jugut njoftoi se Koreja e Veriut është plotësisht e gatshme për testin e saj të shtatë bërthamor dhe mund ta kryejë shpejt nëse Kim Jong-un jep urdhrin.
