Së pari ishin Ishujt Faroe. Pastaj erdhi Bundesliga e Gjermanisë. Tjetra është Estonia. Kur të luhen tri ndeshje futbolli të martën (sot) në Estoni, do të bëhet liga e tretë e Evropës që del nga mbyllja e detyruar nga pandemia COVID-19. Ndeshjet do të fillojnë, në mënyrë të pashmangshme, në stadiume boshe, megjithëse tifozët mund të kthehen në tribuna në korrik. Miratimi i Qeverisë duhet të lejojë deri në njëmijë tifozë të marrin pjesë në çdo ndeshje në Meistriliiga që i ka dhjetë ekipe prej datës 1 korrik.
“Lidhja emocionale për t’u rikthyer në stadium është gjëja më e rëndësishme”, tha zëdhënësi i Federatës së Futbollit të Estonisë, Mihkel Uiboleht.
Tifozët patën mundësinë t’i shohin ekipet e tyre vetëm në fundjavën e parë të një sezoni mars-nëntor, që është normale në Evropën Veriore të ftohtë. Sezoni i Estonisë 2020 – i shkurtuar në 32 ndeshje në vend të 36 – tani është planifikuar të përfundojë më 12 dhjetor.
“Ka pasur dimër kur në 12 dhjetor kishte një metër dëborë”, shtoi Uiboleht, megjithëse temperaturat në vitet e fundit ishin më të larta.
Orari i mëvonshëm mund të jetë një çështje për zyrtarët e futbollit nëse ka një valë të parashikuar gjatë dimrit me infeksionet COVID-19. Estonia, një vend me rreth 1.3 milionë njerëz, pati 64 vdekje deri të hënën. Përgatitjet për rifillimin e ligës, përfshirë testimin e lojtarëve, stafit të klubit dhe zyrtarët e ndeshjeve, tejkaluan nivelin që kërkoi Qeveria e Estonisë, tha Uiboleht. Programet e ndihmës shtetërore për punëdhënësit dhe pronarët e stadiumeve kanë ndihmuar gjithashtu klubet që përballen pothuajse katër muaj pa të ardhura nga dita e ndeshjes.
“Unë nuk mund të them se nuk do të ketë falimentime”, pranoi Uiboleht, duke lavdëruar pagesën e parakohshme të UEFA-s, prej rreth 68 milionë eurosh. Këto para i dëmshpërblejnë klubet që lëshuan lojtarët e ftuar nga ekipi kombëtar për ndeshjet kualifikuese të Kampionatit Evropian për vitin e kaluar dhe ato të Ligës së Kombeve për vitin 2018. Klubet në të gjithë Evropën, nga Barcelona, Liverpooli e deri te Flora Tallinn dhe Nomme Kalju, kishin të drejtë në të njëjtën normë për një lojtar.
