Për shkak të nivelit të lartë të të infektuarve me COVID-19 por edhe frikës se ky trend mund të rritet, shumë shtete europiane e jo vetëm kanë vendosur që për festat e fundvitit të rikthejnë masat izoluese.
Greqia ka vendosur të zgjasë izolimin deri në 7 janar duke përfshirë shtetrrethimin gjatë natës nga ora 22:00 deri në orën 5:00 të mëngjesit.
Shkollat, restorantet, baret dhe gjykatat do të qëndrojnë të mbyllura.
Duke nisur nga e mërkura Londra do të vendoset nën nivelin më të lartë të kufizimeve.
Sekretari i Shëndetësisë, Matt Hancock njoftoi se kufizimet e Nivelit 3, mbulojnë 60% të popullsisë së Anglisë.
Dyqanet mund të qëndrojnë të hapura, por teatrot dhe sektori argëtimit duhet të mbyllen. Hancock vuri në dukje se rritja e rasteve mund të lidhet me një variant të ri të koronavirusit i gjetur kryesisht në rajonet jugore të Anglisë.
Pasagjerët që mbërrijnë në Angli nga sot do të jenë në gjendje të marrin pjesë në një strategji të re testimi, që synon uljen e periudhës vet-izoluese 14-ditore deri në dy të tretat.
Nga sot Holanda hyn në izolim të dytë kombëtar çka do të thotë baret, shkollat, dyqanet do të qëndrojnë të mbyllura deri në 19 janar.
Supermarketet bankat dhe farmacitë do të lejohet të qëndrojnë të hapura.
“Coronavirus po përhapet edhe më shpejt sesa kemi parashikuar dhe kjo është arsyeja pse Holanda po shkon në bllokim për një periudhë prej të paktën pesë javësh. Holanda po mbyllet. Kjo do të thotë që ne do të mbyllim të gjitha vendet ku njerëzit mblidhen në grupe, me disa përjashtime,” – tha Mark Rutte, kryeministri i Holandës.
Kryeministri Rutte u bëri thirrje qytetarëve të qëndrojnë në shtëpi dhe të shtyjnë udhëtimet ndërkombëtare të paktën deri në 15 mars.
Gjermania është vendi i fundit europian që vendos kufizime të cilat do të fillojnë nga 16 dhjetori dhe do të zgjasin deri më 10 Janar.
Shumica e dyqaneve me pakicë do të mbyllen, përveç atyre që mbulojnë nevojat ditore ose të pushimeve.
Takimet private do të kufizohen në maksimum pesë persona nga dy familje, duke përjashtuar fëmijët deri në moshën 14 vjeç.
Franca do të heqë shtetrrethimin në prag të Krishtlindjes, por baret, restorantet dhe vendet e skive do të qëndrojnë të mbyllura deri më 20 janar. Edhe kryebashkiaku i New York, De Blasio ka paralajmëruar se për shkak të nivelit të lartë të COVID-19, vendi rrezikon të rimbyllet sërish.
