Ky kompleks pallatesh pranë zonës së Kasharit është dëmtuar nga tërmeti i 26 nëntorit. Aty jetojnë rreth 140 familje, të cilat shprehen se ndihen të rrezikuar nga banesat e dëmtuara.
Prej më shumë se një viti banorët e zonës jetojnë ende në këto kushte.
Siç mund ta shikoni në video, muret janë të çara dhe të plasaritura, jo vetëm brenda banesave por edhe në fasadën e pallatit.
Qytetarët thonë se disa prej riparimeve i kanë bërë vetë.
Nga akt-konstatimet e para shtëpitë u kanë rezultuar në shkallën e dëmtimit DS2 dhe DS3, por pronarët nuk kanë marrë ende asnjë ndihmë nga institucionet për rindërtimin e tyre.
“Ekspertizë kanë bërë, shumë banesa kanë dalë të pabanueshme. Do të vijmë, do ti shikojmë dhe do t’ju shpërblejmë por deri sot nuk kemi marrë asnjë përgjigje.”
“Në fillim na thanë është i pabanueshëm si kopmpleks derisa të vinin dhe ta kontrollonin. Erdhën gati një muaj pas, mund të futeni brenda thanë por themelet duhet ti kontrollojmë prapë. Nuk ka ardhur njeri të thotë diçka.”
Pavarësisht se ekspertiza paraprake i ka nxjerrë këto shtëpi të banueshme qytetarët thonë se jetojnë me frikë.
“Taraca është në gjendje të keqe, e çarë, jemi të rrezikuar.”
“Nuk ke ku të shkosh por të friksuar rrimë.”
Nga njësia administrative e Kasharit informojnë se për këtë pallat po vijon ekspertiza e thelluar dhe pa marrjen e rezultatit nuk mund të lëvrohen dëmshpërblimet apo bonuset e qirasë në rast se do të rezultojë i pabanueshëm.
