Kryetari i Partisë Demokratike, Lulzim Basha, nga qyteti i Krujës deklaroi sot se nuk do punojë për të mbetur në histori, por që rinia shqiptare të ketë shanse të barabarta me rininë europiane.
“Njerëzit që punojnë për të hyrë në histori në përgjithësi janë njerëz të tmerrshëm, ose diktatorë, ose psikopatë. Iu shkaktojnë shumë vuajtje popujve të vet, ose janë kaq shumë në dashuri me veten, sa nuk duan njeri tjetër. Prandaj, mos më kërko të jem kryeministër që bëj gjithçka për të mbetur në histori. Shpërblimi më i madh për mua nuk është të mbetem në histori, por t’i shoh shqiptarët, veçanërisht rininë, të kenë të njëjtat shanse dhe mundësi si rinia europiane”, u shpreh ai.
Sipas Bashës, qeveria shqiptare ka braktisur rininë e cila sipas tij është përballë dy zgjidhjeve: kriminalizimi ose emigrimi.
“Papunësia dhe mjerimi janë produkt i kësaj qeverie. Kjo qeveri nuk ka asnjë zgjidhje. E vetmja rrugë që kjo qeveri i ka treguar rinisë, është emigracioni. Rinia është përballë dy zgjidhjeve, kriminalizimi ose emigrimi. Puna më e mirë që mund të bëjë qeveria është t’i hiqet qafe popullit dhe ta lërë të punojë. T’i hiqet qafe drejtësisë që të gjithë të jenë të barabartë para ligjit”, u shpreh Basha.
Ai ka deklaruar se do bëjë gjithçka që të mos lejojë largimin e të rinjve. “Unë ju premtoj se do bëjmë gjithçka që të mos zgjidhni këto dy rrugë, por të qëndroni e të ndërtoni të ardhmen këtu. Duhet të investojmë për të përgatitur krahun e punës së kualifikuar që të përfitojmë nga mundësia që na jep pozicioni në zemër të Europës. 10 mijë studentët më të mirë do marrin një vit stazh pune me pagesë nga buxheti i shtetit”, tha kreu i demokratëve./ATSH/
